(ERGO) – Waxaa bilihii ugu dambeeyay sii kordhayay haweenka raggooda ay Yurub u tahriibeen ee maxkamadda degmada Laascaanood ee gobolka Sool u dacwoonaaya.
Tan iyo bishii Febraayo ee sanadkii 2018, markaas oo ay billowdeen kiisaska haweenka maxkmadda imaanaya, waxaa la diiwaan geliyay kiisas ka badan laba boqol, kuwaas oo dhammaantood ka cabanaya dayac iyo dandaro soo wejahday kadib markii ay nimankoodii u tahriibeen qurbaha, sida uu Raadiyo Ergo u sheegay gudoomiyaha Maxkamadda Degmada Laascaanood, Xasan Maxamed Warsame.
“Maxkamadda waxay qabatay kiisaska waxaan u bixinay laga tahriibayaasha, haddeer tusaale ahaan waxaan kuu soo qaadayaa, (Haweenkan) waxay dacwaynayaan ninkii wuuba ka tahriibaye, carruurtii lagaga tagay ayay masaariif u la’yihiin, dabeedna ehelkoodii ay ka dhasheen caruurtani ayay rabaan in ay baxshaan masaariifta,” ayuu yiri gudoomiye Xasan.
Sida uu sheegay guddoomiyaha, haweenka dacwoonaaya ayey da’doodu u dhexaysaa 18 ilaa 28 jir, kuwaa oo inta badan la dalaan dhacaya sidii ay u maarayn lahaayeen masaariifta reerahooda.
Guddoomiyaha ayaa tilmaamay in kiisaska maxkamadda ay isugu jiraan haween dalbaday masaariif iyo kuwa codsaday in laga furo nimankooda oo ay sheegeen in aysan warba ka haynin meesha ay ku dambeeyeen.
“Kuwa ugu badan waxaa weeye seddex sano ilaa afar sano, qaar baa jira oranaya ninki Jarmalka ayuu galay oo tahriibki wuu ka baxay, wax hadal ah kama haayo, kuwaasi waa kuwa aan ku dacwoon xuquuq ilmaha ee naftooda in uusan ugu maqnayn ninnimo ee uu yahay nin iska tegay oo aan la soo tashan ee uu yahay nin aanan la tashan, taasna sharciga wuxuu ka qabo ayaan waafajinaa,” gudoomiyaha ayaa u sheegay Raadiyo Ergo.
Sida uu sheegaayo guddoomiye Xasan, maxkamadda ayaa waxay xalisay ilaa 33 kiis. 23 ka tirsan ah kiisaskaas ayaa waxaa lagu xaliyay masruuf halka 9ka kalena lagu dhameeyay furiin.
Qoysaska ay ka soo jeedaan dhalinyarada ka tahriibtay xaasaskooda ayaa maxkamadda looga yeerayay intii ay socdeen dacwadaha maadaama ay yihiin dadka ugu dhaw ee qaadi kara mas’uuliyadda ragga maqan.
Haweenkaasi maxkamadda u dacwooday waxaa ka mid ah Faadumo Cabdi Maxamed oo joogta Magaalada Laascaanood.
Faadumo oo ah hooyo dhashay afar caruur ah waxaa ay ka mid haweenka ay maxkamaddu ka fasaqday raggii ka tahriibay.
Go’aankan ayay maxkamaddu qaadatay markii ay reerka dhalay saygeeda sheegeen in aysan awoodin masruufkeeda, iyadana ay maxkamadda ka codasatay furiin.
Faadumo waa hooyo isku filan oo nolosha caruurteeda ka maaraysa meherad ay ku iibiso cunto bisil.
Maxamed Cabdiraxmaan oo ah ninka laga furay Faadumo wuxuu sanad iyo bar ka hor u tahriibay Yemen.
Intii uusan ka tegin magaalada Laascaanood, wuxuu ka shaqayn jiray dhismaha guryaha.
Bilowgii bishii Desembar ee sanadkii tagay ayey Faaduma u dacwootay maxkamadda
“Maxkamaddu waxaan ka codsaday in ubadkaa yaryar mustaqbal baa sugaya in reerkoodu ila ogaadaan, markaa haddii dee aysan wax warbixin ah aysan iga siin karin, aniga la tabcaya inta aan la tabci karo, in warqadayda la iga qaad, ….. Maxakamaddi warqadaydii bay iga siisay,” ayay tiri Faadumo
Caasha Diiriye oo ah hooyo dhashay labo caruur ah waxay dacwad ka dhan ah saygeeda u gudbisay maxkamadda bishii lixaad ee sanadkii hore ee 2018.
Cabdiraxmaan Maxamed Ducaale oo ah sayga Caasha waxaa uu u afduuban yahay koox madax-furasho ka doonayso oo ku sugan dalka Libya. Waxay qabsadeen saddex sano ka hor isagoo isku dayayey in uu si sharci-darro ugu sii gudbo Yurub, sida uu noosheegay walaalkiis Axmed Maxamed
Axmed ayaa Raadiyo Ergo u sheegay in ay ku bixiyeen lacag ka badan $1o,000 sidii loo sii dayn lahaa Cabdiraxmaan oo marba marka ka dambaysa u gacan galayay kooxo kala duwan.
Dhanka kale, qoyska Cabdiraxmaan waxaa looga yeeray maxkamadda degmada Laascaanood bishii Octobar ee 2018 , waxaana ay maxkamadda ku amartay in ay baxshaan masaariifta caruurta uu ka tahriibay.
“Waxaa dhacday in gabadhii ay maxkamadda tagtay oo ay dacwootay, oo ay tiri hadde aniga hadaanan biil la i siinayn, anagana aan ku mashquulnay wiilki iyo xaaladiisii, waxay tiri hadaanan la I biilayn warqadaydii ayaan rabaa, maxkamaddii iyo arrinkii baynu dhexgalnoo, innagaa xalinay arrinkii oo reerka mas’uuliyadiisa qaadnay, oo gabadhii biil baynu u qornay oo ah 200 oo doolar bil walba,” ayuu yiri Axmed.
Waxaa sidoo kale jira haween raggooda ay ka tahriibeen oo aan weli dacwadooda maxkamadda balse qorshaynaayo.
Safiyo Maxamed ayaduna waxay ka mid haweenka qorshaynaayo in ay dacwadda gaystaan maxkamadda degmada Laascaanood.
Cabdixakiin Jaamac Maxamed oo ah sayga Safiyo waxaa uu dalka ka tahriibay sanadkii 2016 markaa oo uu ka dhoofay magaalada Boosaaso.
Sida ay sheegayso Safiyo, Cabdixakiin ayaa hada jooga Libya halkaa oo uu rajaynaayo in uu uga sii gudbo Yurub.
“Waxaan rabaa in aan maxkamaddaas isaga fasaqo, (codka suaasha ka jar) sababtu waxay tahay hadde waxay ahayd in uu nala soo hadlo, waxaana igu dhaliyay caruur yaryar, wax i la koriyana mahaayo,” ayay tiri.
