Shirkada SBI ee cabitaanka sameysa, ayaa xaafadaha magaalada Hargeysa ka sameynaysa biyo galin dhinaca beebka ah si ay biyo u helaan 22,000 oo qoys oo magaalada ku nool.
Tobankii maalmood ee u dambeeyay, ayaa xaafadaha magaalada shaqadaasi ka socotaa, iyadoo ay in muddo ah dadka deggan Hargeysa ay ka cabanayaan biyo la’aan magaalada ka jirta.
Biyo la’aantaas ayaa mararka qaar keenta in qiimaha biyaha yar ee la heli karo ay aad u qaaliyoobaan. Inkastoo ay socdeen isku dayo badan oo biyo magaalada lagu gelinaya, haddana wali si buuxda looguma wada-guuleysan.
Weriyaha Raadiyo Ergo ee Hargeysa, Ilyaas Cabdi Cali ayaa la kulmay oo wareystay guddoomiyaha guud ee shirkadda SBI, Axmed Cismaan Geelle, wuxuuna marka hore weydiiyey in uu faahfaahin ka bixiyo howsha ay wadaan.
