(ERGO) – Ruqiyo Xasan Maxamed waa 25 hooyo u ah 3 carruur ah, waxay nolosha qoyskeeda ku maareysaa $40 oo si toddobaadle ah ay uga hesho qalista iyo qallajinta kalluunka. Waxay ku nooshahay xerada barakaca Banaadir oo ku taallo magaalada Boosaaso.
Xirfaddaan waxay ku shaqeysanaysaa muddo saddex bilood ah. Waxay Raadiyo Ergo u sheegtay inaysan ka welwel qabin in qoysku uu u qado biil la’aan haddii seygeeda oo ah fundi aan shqo toos ah haynin uu wax shaqo ah soo waayo maalintaas.
“Hadda kalluunkaan baan isku dabarnaa, biilka haddii la waayo waxaan cuni jirnay bariis dallac-bilaash ah, laakiin hadda kalluunkaas baan ku darsannaa,” ayay tiri Ruqiyo oo xustay in lacagta oo keliya aysan ka helin shaqadaan ee sidoo kale ay ka hesho hilibka kalluunka oo ay ku goosaarato raashinka.
Biilka guriga oo ay meel iska saartay ka sokow waxay fursaddaan uga faa’iideysatay inay labo carruurteeda oo kala ah wiil iyo gabar ay da’dooda kala tahay 6 jir iyo 4 jir ay waxbarasho ka gaysay. Waxay bartaan dugsi quraan, far-soomaali iyo xisaab, waxayna bishi ku bixisaa $15.
Ruqiyo wax shaqo ah ma hayn marki ay xirfaddaan baraneysay, oo waxaa shaqo ugu dambeysay muddo hadda laga joogo hal sano, waxayna ka shaqeyn jirtay aruurinta qashinka laga qaado xaafadaha, taas oo meesha ka baxday markii ay timid shirkad qashinka ka qaaddo guryaha.
Labo iyo toban sano ayay ku nooshahay xerada barakaca ah ee Banaadir, waxayna markeedi hore colaado uga soo barakacday magaalada Kismaayo.
Hay’adda cuntada iyo beeraha u qaabilsan Qaramada Midoobay ee FAO ayaa labo boqol oo qof oo Ruqiyo ay ka mid tahay u tababartay xirfadda jilaabbashada kalluunka, qalistiisa iyo qallajintiisa.
Yuusuf Axmed Xiddig, oo ah madaxa mashruuca kalluumeysiga ee FAO ayaa Raadiyo ergo u sheegay in dadka ay tababareen oo isugu jira rag iyo dumar ay ka soo kala xuleen 10 xero barakac oo ku yaalla magaalada. Kalluunka la soo dabo ee habkan qallajinta lagu sameeyo waxaa dadka dib uga sii iibsato hay’adda sida uu sheegay Yuusuf.
Inta badan ragga waxaa la baray kalluumeysiga. Raggaas waxaa ka mid ah Cabdiladhiif Cabdow Cabdalla oo qoyskiisu uu ka kooban yahay siddeed qof.
Waa 40 jir ku nool xero barakac oo la yiraahdo Mustaqbal 2 oo ku taalla Boosaaso. Xirfaddan wuxuu ku shaqeysanayaa ilaa horraanti bishii la soo dhaafay ee Oktoobar, wuxuuna si maalinle ah uga helaa $10 oo uu ku maareeyo nolosha qoyskiisa.
“Lacagtaas qaar biil baan ka dhigaa, qaar waxbarashada carruurta ayaan ku maareeyaa, qaarna waan keydiyaa oo daawo iyo wixi loo baahdo ayaan meel u dhigaa,” ayuu yiri Cabiladhiif.
Shan ka tirsan carruurtiisa waxay bartaan dugsi quraan iyo waxbarashada dugsiga hoose, waxaana bishi uga baxa $60.
Raadiyo Ergo ayuu u sheegay in uusan hadda welwel ka qabin in carrurtiisa ay qadaan ama uu u waayo lacagta waxbarashada, sidi dhici jirtay intii uusan xirfaddaan baranin oo uusan hayn jirin shaqo toos ah.
Markiisi hore wuxuu ku shaqeysan jiray macallinimo uusan ku heli jirin shaqo toos ah, iyo inuu mararka qaar tago suuqa Boosaaso oo uu ka raadsado fursad xamaali, si maalintaas uu u dabbero biilka qoyska.
Labo iyo toban sano oo uu ku noolaa Boosaaso muusan haynin shaqo toos ah, waxayna qoyskiisa ku nool yihiin ilaa wakhtigaas xero barakac. Markoodi hore qoyska Cabdiladhiif waxay ka soo barakaceen Muqdisho oo dagaallo ka jiray ay ku khasabtay inay ka cararaan.
