Xerada Naasa-Hablood Kow ee bariga Magaalada Hargeysa ayaa gubatey, iyadoo qoysaskii ku noolaa qaarkood ay hoy la’aan yihiin.
Qoysaskani waxey bahlah u yihiin dhibaatooyin kala duwan, sida qabowga habeenkii dhaca, kuleylka dharaartii, roobka iyo dabeysha.
Caawinada kaliya ee ay heleen, ayaa ah raashin 30kg ah, oo isugu jira Bur, Sonkor iyo Bariis, oo ay ku caawisey hey’adda Islamic Relief.
Lama ogga sababta dhalisay dabkan. Waxaa ku dhintay Ibraahim Maxamed, oo dadiisu aheyd 18 sano jir, wuxuu ahaa fasalka labaad ee dugsiga sare ee Gacan Libaax.
Afar qofood oo kale oo waayeela ayaa ku dhaawacmey. Waalidiinta wiilka dhintay ayaa waxaa lasoo darsay walwal aad u baaxad weyn.
Xamda Maxamuud Maxamed, oo ay walaalo ahaayeen wiilka dhintay, ayaa sheegtay in aabbaheed miyir doorsoomay markii uu arkay meydka wiilkiisa, haddana uu jiifo cisbitaalka weyn ee Hargeysa.
Hooyadeed ayaa sidoo kale waxaa ku soo booday xanuun markii ay aragtay maydka wiilkeeda, waxaa lagu hayaa guri ay leedahay walaasheed oo magaalada degan. Maydka wiilka oo tallaagad ku jira ayaa waxaa baaraya ciidanka booliiska.
Haweeya Haybe Jaamac oo 46 jir ah iyo sideed carruur ah oo ay dhashey, ayaa ka mid ah dadkaas, waxey sheegtay in xilligi dabku ka cayey xerada ay xanuun la jiiftay cisbitaalka guud ee Hargeysa.
Waxey sheegtay in salaadii subax ay kasoo baxday isbitaalka, si ay u ogaato nolosha carruurteeda, oo iyagoo hurda dabku qabsaday guriga.
Afar guri oo aqal Soomaali ah oo ay deganaayeen, iyada iyo saddex ka tirsan caruurteeda oo xaas ah, ayaa xeradan kaga gubtay.
In kasta oo aan haweenka dibadda laga soo weerarin, haddana qoysaskan ayaa ka cabsanaya xayawaanada iyo dhallinyarada dhaca geysata, maadaama ay meel magaalada ka baxsan ku taalo xeradani.
Shan boqol iyo lixdan qoys ayaa ku nool xeradan oo degan, ciidamada dab damiska ayaa sheegay inaan la garanayn sababta dabka dhalisay.
Dhanka kale, Sahra Cali Liibaan, waa konton jir oo xeradan ayey in muda ah ku nooleyd, iyadoo kaliya ayaa banaanka u hoyata, waxay ii sheegtay in odeygeedii uu qaraabadiisa u tagay markii uu baaba’ay gurigii ay deganayeen.
Sahra waxay ii sheegtay in dhamaan agabkii guriga u yaalay uu gubtay oo ay hadda ka joogto caydh, waxay iiga warantay xaaladda ay hadda ku sugan tahay ee xerada ku haysata.
Dhammaan qoysaskan haatan walwalka uggu weyn waa sidii ay ku heli lahaayeen hoy ay ku noolaadaan, maadaama kuwoodii hore ay bas beeleen.
