Heshiis laga gaarey colaad u dhaxeysay laba qabiil oo muddo bil ah oo ka jirtay deegaannada Dhumay iyo Daba-taag, oo ku yaalla koonfurta gobolka Sool, ayaa rajo u abuuray kumanaan qof oo siyaabo kala duwan ay u saameysay.
Colaadda ayaa sababtey barakaca dadkii ku noolaa labada deegaan ee dagaalku ka dhacay iyo daafahooda. Dadka oo isugu jiray ganacsato iyo xoolo dhaqato ayaa u barakacey dhawr deegaan oo kala ah Geed-dheer, Qooraansay, Bilcil Jabka iyo deegaanka Dhagax-Isguro. Waxaa xirmey dhammaan isu socodka ganacsiga iyo dadka.
Qodobbada heshiiska oo ah 15 qodob oo la isku raacey shaley, ayaa waxaa qeyb ka ahaa culimada iyo odayaal dhaqameed , iyo wakiillo ka ka kala socday labada qabiil ee dirirtu ka dhexeysay. Kulanka lagu kala saxiixdey heshiiskan ayaa ka dhacey magaalada Laascaanood.
Sheikh Siciid Muuse Nuur, oo kamid ah culimada xukumada diiniga ah soo saarey, ayaa sheegay in qodobbada mid kamid ah qabiilada lagu xukumay uu ahaa inuu bixiyo 14 ruux magtooda, taasoo lagu qiimeeyey tiro geel ah oo gaaraysa 1300 oo neef, halka qabiilka kalana lagu xukumay in uu bixiyo magta 7 ruux oo loo xukumey 650 neef oo geel ah.
Colaadda labadan qabiil ayaa asal ahaan waxey ka bilaabatey markii nin la dilay, kadib qabiilka ninka la dilay ay weerarareen tuulo ay deganaayeen qabiilka ninka wax diley, iyadoo qaadatey daminta colaadan 20 maalmood.
Waxaa kale oo qodobada ku jiray in guryihii la gubay la bixiyo lacagtooda, in gawaari lakala dhacey la isu soo celiyo. Sheekh Siciid ayaa sheegay in diyada dadka la kala dilay lagu heshiiyey in la bixiyo bisha April ee sanadka soo socda. Haatan waxaa la bixiyey oo kaliya waa duugta dad ku dhintay colaadda oo qofkiiba la bixiyey lacag dhan kun dollar.
Caaqil Cabdirisaaq Maxamed, oo ka mid ahaa odayaasha nabadeynta ku jiray, ayaa sheegay inay soo saareen afar qodob oo dhaqanka lagu saleeyey, waxeyna u badnaayeen ganaaxyo la duldhigay qabiillada. Wuxuu sheegay in qabiilkii bilaabay dagaalka lagu xukumay inay bixiyaan 80 neef oo geel ah, halka qabiilka kale lagu xukumay 50 neef oo geel ah.
Dagaalka ayaa waxaa ku dhaawacmey 62 ruux oo qaarkood wali ay la jiifaan dhibaatooyinkii soo gaaray, heshiiska ayaa sidoo kale waxaa ku jira dad aan ka dhalan laba qabiil, balse dhibaato soo gaartay oo iyaga loo xukumay wixii soo gaaray.
Jaamac Iidle Aadan wuxuu kasoo jeedaa mid ka mid ah qabiillada dagaalamay, wuxuu sheegay in dhankooda ay soo dhaweynayaan heshiiska la gaarey ayna ku qanacsan yihiin qaabka loo maamuulay dhaqan galkiisna ay diyaar u yihiin.
