-ERGO) –Midowga aqoonyahanada Buuhoodle ayaa deeq waxbarasho siiyay ardayda dhameeyey dugsiyada dhexe sanad dugsiyeedka 2017/2018, kuwaas oo aan awoodin inay iska bixiyaan lacagta iskuulka. Deeqdan waxbarasho oo ay ka faa’idaysanayaan 20 arday ayaa midkiiba bishii laga bixinayaa $15 afarta sano ee ay dhiganayaan dugsiga sare ee isla iskuullada ay dhigan jireen.
Waxaa deeqdan ay ka dambaysay kaddib markii dhallinyaradan ay sameeyeen cilmi baaris ay ku ogaadeen in carruurta deegaanada Buuhoodle hoos yimaada ay ka haraan waxbarashada marka ay dhameeyaan dugsiga dhexe ama inta aanay dhameyn sababo u badan waaliddiinta oo aan awoodin inay ka bixiyaan lacagta iskuulka.
Cabdilaahi Caydiid oo wiilkiisa Cabdiraxmaan kamid noqday ardayda waxbarashada bilaashka ah ka faa’iidaysanaysa ayaa Raadiyo Ergo u sheegay inuu aad ugu farxay kaalinta wiilkiisu ka galay iskuulka dhexe taas oo dhaxal siisay inuu waxbarasho bilaash ah helo dugsiga sare inta uu dhiganayo.
Cabdilaahi qoyskiisu wuxuu ka kooban yahay 8 qof 5 ka tirsan carruurtiisa ayaa waxbarashada gaadhay. Wuxuu sheegay in aanu awoodin inuu waxbarashada ka bixiyo guud ahaan carruurtiisa, deeqadana ay ka caawisay in cunug uu dhalay uusan ka harin waxbarashada.
Wuxuu xusay in waxbarashada dugsiga sare ay ka lacag badan tahay tan dugsiga dhexe taas oo keeni lahayd in mar uun uu carruurta ka wada bixin waayo waxabarashada, wiilkiisa iyo dhallinyarada waxbarashada ka bixinaysana ay arrintaas ka badbaadiyeen.
Buuhoodle iyo deegaanada hoos yimaada ayay marar badan ardaydu ka hadhaan waxbarashada marka ay dhameeyaan dugsiga dhexe, isudduwaha wasaaradda waxbarashada Puntland ee gobolka Cayn Cabdikariin Maxamed Cilmi (Cabdiweyne) in 200 ayaa labadii sanad dugsiyeed ee lasoo dhaafay ay ka hareen waxbarashada dugsiyada sare.
Ardayda ayaa iskuulka uga hara duruufo kala duwan oo isugu jira kuwo dhaqaale, gabdhaha oo marka ay guursadaan ka hadha waxbarashada iyo qaar la sheego in balwadda qaadku uu sabab noqdo ka hadhitaankooda waxbarashada, sida uu Raadiyo Ergo u sheegay isuduwaha wasaarada waxbarashada.
Madaxa waxbarashada ee ururka Aqoonyahannada Buuhoodle Dr. Cabdulqaadir Cabdiraxmaan Maxamed ayaa Radio Ergo u sheegay in ardaydan ay kasoo xuleen 10 iskuul oo ku yaalla Buuhoodle, Xadhadhan, Widhwidh, iyo Balicad, waxaana iskuul walba laga qaatay labo arday oo ah kuwii kaalinta koowaad iyo labaad ka galay imtaxaanka shahaadiga ah ee sanadkan laga qaaday ardaydii dhamaysay dugsiga dhexe oo u gudbaya dugsiga sare.
Cabdulqaadir ayaa sheegay in deeqdan waxbarasho ay xiligaan kusoo beegtay inay tahay markii ugu horreysay ee ururkoodu arrin noocaan ah qabto ayna ku aadiyeen sanad dugsiyeedkan, wuxuuna xusay inay ballan qaadeen in sanad walba 20 ay arday oo cusub oo deeq waxbarasho siin doonaan si dhallinyarada deegaanka ay ugu dhiirigeliyaan in waxbarashada sii wataan, taas oo marba marka ka dambaysa ay badin doonaan.
Ardaydan helay deeqda waxbarasho waxaa siddeed ka tirsan ay yihiin gabdho shan ay galeen kaalinta koowaad. Ayaan Cabdi Faarax oo kaalinta koowaad ka gashay dugsiga dhexe ee Imaamu Nawaawi oo ku yaala Buuhoodle, waxay fadhisaa fasalka 1aad ee dugsiga sare ee Buuhoodle, Raadiyo Ergo ayay u sheegtay in qoyskoodu yihiin danyar. waxay ku haminaysaa inay gaarto heer jaamacad oo aanay daruuf darteed uga harin waxbarashada.
Wuxuu xusay in ujeedka ay deeqdan ka leeyihiin yahay in ardayda dedaalaysa aanay lacag darteed waxbarashada uga harin iyo inay ardayda ku dhiirigeliyaan in buundooyin sare ay keenaan si tayadooda waxbarasho u kororto.
