Jibriil Xasan Muuse waxaa uu ka tirsan yahay beeraleyda Midi-gale, wuxuuna leeyahay beer cabirkeedu dhan yahay higtar barkiis. Waa aabaha qoys ka kooban 22 qof Laba toddobaad ka hor waxaa beertiisa ka soo go’ay dalag u badan khudaar uu u iib geeyey suuqa deegaanka Midi-gale oo 40km dhinaca koonfur ka xigta degmada Badhan ee gobolka Sanaag.
‘Laba sano sanadkaan ayuunbaa wax ii soo baxeen, intii hore abaar daran ayaa ka jirtay deegaanka”
Jibriil wuxuu ka mid yahay 100 qoys oo xoolo dhaqato beeraley ah, kana faa’iideysanaya biyo xidheen maamulka Puntland bishii May ee sanadkaan ka hir geliyey deegaankaas.
Deegaankaas oo aan lahayn biyo qabatino, beeralaydu waxay ku tiirsanaayeen biyaha roobka, markii lawaayana ma heli karin biyo ay ka dhigtaan waraab.
Jibriil oo muddo beeraley ahaa wuxuu tilmaamayaa in wax soo saarka beertiisa ay qoyskiisa oo dhan ka wada faa’iideysanayaan. Marka laga tago masruufa qoyskiisa waxaa uu sidoo kale wax soo saarka beertiisa uu kaga bixiyaa waxbarashada 2 Caruur ah oo uu dhalay iyo Shan walaalihiis ah oo ka tirsan Qoyskiisa
Biyo xireenkan laga hirgeliyey Mida-gale ayaa qeyb ka ahaa mashruuc balaaran oo loogu talagalay in dadka deegaankaas ay kaga faa’iideystaan biyo ahaan iyo wax soo saar ahaanba kaas oo ay maalgalineysay hay’adda hormarinta Qaramada Midoobey ee UNDP, waxaana fulinayey wasaaradda deegaanka iyo isbeddelka cimilada ee Puntland.
Sida uu noo sheegay Eng Cabdiweli Yuusuf Aadan oo ah injireenka guud ee wasaaradda deegaanka Puntland ee la dhisay biyo xireenka, cabirka biyo xireenkan ayaa gaarayo ilaa 2 mitir, halka uu balac ahaan dhan yahay 50 Mitir, wuxuuna halkii mar qaadaya 150 kun oo fuusto oo biyo ah oo u dhiganta 30 Milyan oo liitar.
Cabdinuur Maxamed Faarax oo markii ugu horreysay noloshiisa sanadkan uu noqday beeraley kaddib markii Mida-gale biyo xireenka loo sameeyey ayaa isna u sheegay Raadiyo Ergo in ay uga soo go’een khudaarta cagaaran. Muddo saddex bilood ah ayaa isaga iyo saddex qof oo la shaqeysa ay beerta ka shaqeynayeen. Wuxuu xusay in markii hore ee billaabay in uu wax beerto uu cabsi ka qabay sida uu noqon doono dalagga, laakiin hadda markii ay soo go’day ay rajo badan ku abuurtay in uu sii wado wax beerashada.
“Runtii waxaan geliyey beertan ilaa $1,000, aad baan uga shaqeeyey. Waa shaqadeyda keliya, iyada uun baan ka shaqeeyaa, oo aan reerka ka biilaa. Dalagii hadda soo go’ayna waxaan isugu jiraa mid aan beerta dib u geliyey, mid aan aniga biishay iyo mid aan mushaar shaqaalaha ku bixiyey”
Guddoomiyaha maamulka deegaanka Midi-gale Awgeed, Cawad Cali Jaamac ayaa u sheegay Raadiyo Ergo in fursadaha wax beerashada ee deegaanka ay kordheen wixii ka dambeeyey markii biyo xireenka la higeliyey. Wuxuu intaas ku daray in deegaanka ay abaarihii gobolka Sanaag ka dhacay si xun saameeyeen, taasoo muddo beeraleyda ka hor-istaagtay in ay wax beertaan.
Beeraleyda Mida-gale ayaa rajeynaya in xilli roobaadka Deyrta ee la filaya bisha soo socota ee October ay kordhiyaan beerashadooda, taasoo ay xuseen in ay dadka iyo deegaankuba ay faa’iido ugu jirto.
Waxyaabaha kale ee ay rajeynayaan dadka deegaanka ayaa ah heerkii biyo la’aanta ee horay oga jiray deegaanka & in markii ugu horeysay deegaankaasi laga iibgeyn doono Qudaar ka soo baxday Beeraha laga hirgaliyay deegaankaasi
