(ERGO) – Faadumo Abuurkar waxay dhex taagan tahay dukaan lagu iibiyo kabaha, dharka carruurta iyo agabka haweenka gacanta ku sameeyaan ee farshaxanka, waana dukaan ay maal gashadeen 12 haween ah oo qaxooti ah, kuna nool xerada IFO
“Maanta waxaan haystaa wax aan ku xisaabtamo oo dhaqaale iga soo galo, mustabalkana aan sii hormarin karo,” ayay tiri Faadumo.
Waa hooyo haysata sagaal carruur ah 5 waa agoon, inta kalana aabahood waa kala tageen, dharka iyo kabahay iibiyaan waxay ka keenaan Nairobi, halka agabka farshaxanka ee kuulaha, jijimaha gacmaha iyo daabaca ay ka soo iibsadaan haweenka xeryaha qaxootiga ku nool ee iyagu guryaha ku farsameeya.
Haweenkaani waxay ganacsiga bilaabeen Juun ee 2017, iyagoo isku darsaday 36000 oo shillin oo ay ku fureen dukaankaan, iyagoo midkiiba bil kasta ay ka qaadato lacag 6 kun oo shillin ah oo ay noloshooda ku kabtaan oo Faadumo qaadatay bishii Abriil.
Raashinka laga bixiyo xeryaha oo ah qammadi, masaggo, digir iyo saliid ayaan ahayn mid ku filan inay qoysasku keligiis ku noolaadaan sida ay Raadiyo Ergo telefoonka ugu sheegtay Faadumo.
“Dhaqaalaha dukaanka naga soo gala waxaan ku iibsadaa raashinka iyo khudaarta dheeraadka ah ee carruurtayda u baahan tahay” Ayey tiri Faadumo.
Waxayna sheegtay inay maalin kasta ku baxdo lacag Ksh 500 una dhiganta ($5). Sanadkiiba saddex jeerna in ay lix ka tirsan carruurteeda oo wax barta ay u iibiso labiska iskuulka, buugaagta iyo qalimaanta oo ay uga baxdo markiiba 5,500 Ksh oo u dhiganta $55, horayna aysan u awoodin inay taas hesho.
“Wuxuu noo noqday meherad, waxaan ka dayntaa marba wixii baahi ah ee dhaqaale u bahan ee igu timaadda, sidoo kale intaan furtay dukaanka waxaan noqday qof la aamina karo oo dayn ka qaadan karta dukaamada kale” Ayey tiri Faadumo.
12ka haweenka ah ayaa ah kuwo haysta carruur ay keligood korsadaan oo qaarna aabayaashood ay kala tageen, kuwana ay ka dhinteen.
Faadumo oo ka soo qaxday dagalladii Muqdisho sanadkii 2007, ayaa sheegtay inay sidoo kale qabato biyo dhaamin iyo dhar dhaqaal ay u samayso qoysas kale, ayna ka hesho maalintii 460 oo shilin.
“Intaan dukaankaan galay waxan helay fursado aan ku kaydsan karo lacag, waxaan kula jiraa 12ka haweenka ayuuto 2 kun bishii ah,” Ayey tiri Faadumo.
Qaxootiga ku jira xeryaha Dhadhaab ayaa qof kasta bishii gargaar ahaan waxaa loo siiyaa min saddex kiilo oo masaggo iyo qamadi ah iyo kiilo digir ah, saabbuun, saliid iyo min 200 oo shilin oo loogu talagalay inay goosaar ka dhigtaan.
Ka hor 2016 oo ahay markii la dhimay waxay sheegtay Faadumo inay fursad u haysteen raashinka la siiyo inay qeyb suuqa geystaan si lacagta ay ku soo helaan ay waxyaabaha kale isaga dabbaraan.
Haweenkani waxay sheegeen in dukaanka hantida u taal ay tahay mid kobceysa oo ay ka leeyihiin rajo mustaqbal oo fiican.
Canab Geeddi oo haweenkaas ka mid ah, isla markaana ah xisaabiyaha dukaanka ayaa Raadiyo Ergo u sheegtay in xisaab xirkii ugu danbeeyey ay samaysay Juune dhamaakeedii, ayna taal hanta gaaraysa 120 kun oo shillin, iyadoo ay jirto lacag 50 kun ah oo iyana dayn ku maqan, ayna iibiyaan laba ka mid ah haweenka, waxayna ku shaqeeyaan hab lacag la’aan ah.
