Qiimaha qudaarta ayaa sare uga kacay magaalada Jowhar ee gobolka Shabeellaha Dhexe, kadib markii fatahaado ay gooyeen beerihii khudaarta, sida ay Ergo u sheegtay Madiino Iimaan oo ah beeralley kana ganacsata khudaarta. Faadumo Macallin Abuukar oo ka tirsan raadiyaha Ergo oo wareysi la yeelatay Madiina ayaa ugu horreyn waydiisey inay sharraxdo qaabka ay fatahaaddu u saameysay beeraha khudaarta.
Madiina: Khudaartii aan fileynay inay inoo soo go`do bishii June, waxaa gooyay fatahaad uu sameeyay wabiga Shabeelle. Bisha Ramadaan oo ganacsigeennu uu aad u fiican yahay, sanadkan waxba kama faa`iidin, oo annaga ayaaba khudaarta nalooga keenaa gobollada kale.
Bilihi March iyo April in uu ku fatahay Webiga taas keentay in khudaarta Jowhar looga keeno deegaano kale, Madiina: Waxaan lahaaa laba beerood mid ka mdi ah ayaa waxaa fadhiya biyo kadib markii u ku fatahay Webiga muddo laga joogo 5 bilood ka hor intii uusan di’in roobkii gu’ga xilligaas oo aan u diyaargarabeynay gooshada dallagga.
Ergo: Haddii roobabkii guga kahor ay fatahaaddu ahayd, maxaa sababay inuu webigu fataho?
Madiina: Biyo uu webigu ka keenay gobollada kale ayaa sababay inuu butaaco, sida deegaanka Qallaafe oo Itoobiya ah iyo Hiiraan.
Ergo: Adiga beertaadu waa imisa Hiktar, sideyse u saameysay fatahaadda?
Madiina: Beerteyda waa 2 hiktar, waxaa iiga bixi jiray khudaarta noocyadeeda kala duwan, fasalkan waxba kama goosan oo biyo ayaa dhex fadhiya. Waad dareemi kartaa, waxaan ahaa qof ka ganacsada waxa beerteeda kasoo go`a, laakiin hadda waxaa khudaarta ay nooga timaaddaa gobollo ay ka mid yihiin Hiiraan iyo Shabeellaha Hoose.
Ergo: Sare u kaca ku yimid khudaarta, heerkuu gaarsiisan yahay?
Madiina: Khudaartu wax walba laba laab ka badan ayay qaaloobeen, kiilada Basbaaska waxaa la gadaa 40,000 shilin Soomaali ah, halka markii hore oo laga soo guri jiray beeraha Jowhar la iibin jiray 3000 shilin Soomaali ah, yaanyada tanaggii waxaa la iibin jiray 30,000-40,000, laakiin hadda waa 120,000 shilin Soomaali, dadka qaar dhib bay ku tahay khudaarta qaaliga ah, maalmaha qaarkood wax nalagama gato sidaas ayaan carruurta biilkooda ku soo saaraa muddo 5 bilood ah.
Ergo: Dhammaan beeraha khudaarta ee Jowhar miyay sidaas u saameeyeen fatahaaduhu?
Madiina: Haa, sababtoo ah beeraha khudaarta waxay ku yaallaan wabiga jiinkiisa.
Ergo: Ma jirto miyaa qaab looga hortagi karo inta uusan wabigu fatihin?
Madiina : Lagama hortagi karo oo Qallaafe oo Itoobiya ah iyo Hiiraan ayuu ka keenaa biyaha, ma ogaan kartid, waana la isku dayay dhowr jeer laakiin laguma guuleysan, wuuna xoog badan yahay markaas oo kale.
Ergo: Goormee laga yabaa in aad dib u tacbataan beeraha khudaarta?
Madiino: Bishan ayaa filaynaa in aan beeranno khudaarta oo aan beeraha ka saarno biyaha.
