Qaar ka mid ah dumarka deegaanadooda kasoo barakacay ee ku nool xeryaha magaalada Muqdisho ayaa sameysanaya ganacsiyo yar yar iyo xirfado ay ku shaqeystaan si ay uga maarmaan ku tiirsanaanta hey’adaha gargaarka. Iskudaygaas ayaa dabo-socda cuntooyinka iyo kaalmada ay bixiyaan hey’adaha shisheeye oo gabaabsi noqonayay sanadihii dambe.
Nuurto Maxamed oo ah agoonley afar carruur ah heysta waxey ka mid ah tahay labo kun oo qof oo dumar iyo carruur u badan oo ku nool aqallo cooshado ka sameysan oo ka dhex taagan xerada Sayidka ee ku dhow xarunta baarlamaanka. Aroorwalba ayey ka xerada, iyada oo raadineysa reer dhar dhaqid u baahan.
Maalinta wanaagsan waxey heshaa 40,000 ilaa 50,000 oo aan dabooli karin baahida qoyska, laakiin waxay dhaantaa maalinta ay dib xerada ugu soo noqoto iyada oo aan shilin helin. “lacagtaas noogu ma filna raashinka saddexda waqti, laakiin waxey dhaantaa sugista deeq aan la hubin xilliga ay imaan doonto,” ayey Nuurto u sheegtay Raadiyoow Ergo oo ah agoonley.
Raaliyo Aweys Axmed waa xirfad yaqaanad ku xeeldheer farsamada danbiilaha cawda, babis xariirka, salliyada, darmaha iyo cuntada fudud, oo ku nool isla xerada Sayidka. Nasiibdarro se, ma heysato qalabka agabkaas lagu farsameeyo, sidaas darteed waxey doorbiday inay kariso kadibna iibiso cuntada fudud sida sambuuska iyo burka. “Saddex carruur ah baa ii joogta, waxaana ganacsigaas ka helaa 50,000 ilaa 60,000 oo shilin maalin walba,” ayey tiri Raaliyo.
Qoyska deegaanadooda kasoo barakacay ee ku nool xeryaha magaalada Muqdisho badidood ma helaan raashin iyo kaalmo joogta ah. Taas ayaa ku qasbeysa inay helaan xirfado iyo shaqooyin ay nolol maalmeedka kala soo baxaan, si uusan dabka uga damin.
Si kastaba, Aamino Xasan Aadan oo ururka Haweenka Qaranka u qaabilsan arrimaha dadka deegaanadooda kasoo barakacay iyo kuwo naafada ah waxey sheegtay inay bilaabeen diiwaangelinta dadka soo barakacay ee magaalada iyo xeryaha ku dhow ku nool. “Tiro-koobkaas wuxuu hordhac u yahay qorshe aan wadno oo ah in dadka soo barakacay xirfado shaqo loo tababaro, kadib shaqo loo abuuro si ay uga maarmaan ku tiirsanaanta gargaarka wixii loo gaaro dhamaadka 2016-ka,” ayey Aamino u sheegtay Raadiyoow Ergo.
