Laba carruur ah ayaa lagu soo warramayaa inay dhinteen laba kalena ay dhaawacmeen kadib markii ay ku dhacday biriq xilli ay ku sugnaayeen gurigooda oo ku yaalla deegaanka la yiraahdo deeraanlle oo 16-Km koonfur galbeed ka xiga degmada Balcad.
Maxamed Bashiir oo qaraabo la ha carruurta ayaa Radio Ergo u sheegay in labada carruur ee dhimatay iyo labada dhawaaca ah ay ka soo jeedaan hal qoys, biriqdana ay keentay roob mahiigaan ah oo ka da’ay deegaanka iyo nawaaxigiisa isbuuci hore.
Maxamed ayaa sidoo kale sheegay in ay jiraan deegaanno kale oo ay ku dhacday biriqida laakiin aan laga warqabin dhibaatada ay geysatay.
Dhanka kale Wararka laga helayo
Tuulooyinka Baarreey, Gunbe iyo xaafadda Hanti-wadaag ee degmada Mahadaay ayaa sheegaya in uu ku fatahay webiga Shabeelle oo mara gobolka Shabeelaha dhexe.
Cali Afrax Dayib oo ku sugan degmada Mahahdaay ayaa Ergo u sheegay in uu fatahaad sameeyey webiga oo jabsaday ilaa 5 KM, taasoo keentay inay barakacaan dadkii ku noolaa 46 guri oo kuteedsan webiga janbigiisa.
Gudoomiyaha tuulada Baarreey oo 7 KM waqooyi- bari ka xigta Jawhar Cali Maxamuud Maxamed ayaa sheegay in webiga uu ku fatahay Tuulada hase yeeshee iskaashi ay sameeyeen bulshada lagu guuleystay in la muuso biyaha, wuxuuse intaa ku daray inay musitaanka ayuu yahay mid aan ku filnayn haddii webigu keeno biyo badan loona baahanyahay caawimaad dheeri ah.
Sanadkii 2013 ayaa webiga Shabeelle fatahaad uu sameeyey waxay saamayn ku yeelatay kumaan kun oo qof oo ku kala sugnaa tuulooyin iyo magaalooyinka waaweyn, xilligaas waxaa meesha ka baxay gabi ahaanba dallaggii beeraha.
Maryan
