Dhismaha wasaaradda beeraha ee Boosaaso waxay hadda hoy u tahay 75 oo u badan carruur, haweeniyo dad waayeel ah, qaar ka mid ah dadkaas ayaa weriyaha Ergo ee Boosaaso la hadlay ugana sheekeeyey duruufo ay qabaan oo ay ka mid yihiin iyagoo carruurtoodi ku kala lumay dagaalka, waalidiintaan ayaa ku maqnaa shaqo, kadibna dantii ku khasabtay inay naftooda la cararaan markay ku adkaatay inay gaaraan goobihii ay ku sugnaayeen carruurtoodu.
Dadkaas waxaa ka mid ah Aamina Cabdullaahi Jaamac waxay la soctey doomihii ugu horeeyey ee ka soo baxay dekedda Mukala markii duqaynta Sucuudigu horkacayo bilaamatay bishii March, waxay Ergo uga sheekaysay siday ku kala lumeen ilmaheedii.
“Anniga 7 carruur ah ayaa dhalay, kan ugu weyni waa 15 jir, kan ugu yarina 2 sano, aabahood laba sano ka hor ayaan kala tagnay, waxay joogeen carruurtaydu magaaladda Cadan anniguna waxaan ka shaqaynayey magaaladda Alqayda, markii dagaalku bilowday ayaan isu diyaariyey inaan aado carruurtaydii, waxaase igu daahay lacagtii, oo dadkaan u shaqaynayey aysan horay ii siin, intaas ka dib waxaa go’ay dhamaan wadooyinkii, waxayna dantu igu khasabtay inaan naftayda la cararo.”
Siday UNHCR sheegtay ilaa hadda 2,272 qof oo ka yimid Yemen ayaa soo gaaray Soomaaliya
Aamina ayaa sheegtay in carruurta hadda ay u hayso gabadh, lana geeyey magaaladda Mukala, ayna hadda quud daraynayso inay doon dib ugu raacdo iyadoo intaas ku dartay in wasiirka arrimaha guddaha iyo qaybaha dhalinyaradda ee Puntland ay xoogaa dhaqaale ah u keeneen.
Safiya Axmed Sabriye waa hooyo iyana 50 jir ah, 12 sano ka hor ayey u tahriibtay Yemen, dagaaladii Yemen markii ay dhaceen waxay kala lumeen laba ka mid ah ilmaheedii oo aysan war ka hayn meel ay jiraan
“Anniga waxaan haystay saddex carruur, waxaan ka shaqaynayey hotel ku yaal xaafadda Sheikh ee magaaladda Cadan, carruurtaydiina laba ka mid ah waxaa mar lagu sheegay Mukalla, welise war sugan kama helin, oo dagaalka ayaa na kala geeyey, waanan isu imaan kari waynay, goobtaan ka shaqaynayey runtii wax kasta way istaageen, cuntadii iyo biyihii ayaa gabaabsi nagu noqday, meesha hotelkaan ka shaqaynayey ku yaalayna aad baa loo duqeeyey.
Xaawo Ibraahim iyana waa hooyo 3 carruur ah haysatay, “Waxaan u shaqaynayey qoys carab ah, reerkii ayaa I yiri naga tag, ma hayno dhaqaale aan ku siino, raashinkii ayaa qaaliyoobay, gaastii ayaa qaaliyowday, noloshii oo dhan ayaa ciriiri noqotay, sidaas ayaan u go’aansaday inaan u soo aado Soomaaliya, ninkaygii iyo carruurtiina waxaan uga soo tegey xeradda qaxootiga ee Alkharaz, Boosaaso ayaan xaaladda ku baxnaaniyaa, haddaysan imaanna waa inaan ku noqdo.”
