Dadka ku dhaqan deegaano ka tirsan Gobolka Gedo ayaa xilligan waxaa soo wajahay biyo la,aan, deegaanada ugu daran ee hadda dhibaatadu ka jirto ayaa ah Faafax dhuun, Geriley, Takar ,Cawsquran, Daarasalaam iyo Caasha cad.
Siraaje Cali oo ka mid ah waxgaradka Faafaxdhuun oo Baardheere ka xigta dhinaca koonfur bari, una jirta 84km ayaa Ergo u sheegay inay gureen warihii oo ahaa isha ay dadku biyaha ka heli jireen, haddana ay dadku ka helaan biyaha laba berkadood oo xogaa ku hareen ayse yihiin qaali oo foostadii lakala siisanayo 200 oo kun una dhiganta lacag $5.
Siraaji ayaa intaas ku daray in bulshada xoolo dhaqatada ahayd ay u hayaameen dhinaca goboladda Jubooyinka iyo deegaanadda webiga Jubba ka maro gobolka Gedo si ay biyo uga helaan.
Xaliimo Sheikh Cabdi oo ka mid ah haweenka deegaanka Geriley ayaa Ergo u sheegtay in degaankaasi aysan hadda lahayn wax biyo ah, booyado ganacsina looga soo dhaamiyo demgadda Wajeer oo Kenya ah, una jirta Gerilay 120km ayaa laga keenaa biyo qiimahoodu qaali yahay, iyadoo foostadina la iibiyo lacag ku dhow $6, mana iibsan karaan dadku, biyaha la helana waxaa lagu isticmaalaa keliya in wax lagu karsado lana cabo.
Sanadkasta marka la gaaro xilligaan jiilaalka ah ayaa deeganadaan hadda biyo la’aantu ka jirtaa noqdaan kuwo qalalan oo dadka iyo duuyaduba haraadaan, mana lahan degaanadani ceelal iyo ilo kale oo biyo laga helo.
