Macalimiinta gobolka Gedo ayaa ku shaqeeya duruufo adag, amaan daradda, dhaqaalo xumida iyo la’aanta kaabayaasha xirfadeed ayaana ah caqabado ay sheegeen.
Cali Maxamed Ciise oo madaxa waxbarashada degmada Garbahaarey ee Gobolka Gedo oo la hadlayey Warbaahinta Ergo ayaa sheegay in tayada macalimiinta gobolku ay liitaan, kuwii horay ay u tababartay dawladii horena noqdeen kuwo gaboobay, aysanna jirin hadda hab ay u helaan macalimiintu xirfaddaha muhiimka u ah wax barista carruurta.
Faarax Sheekh Cadow oo ka mid ah guddiga waxbarashada gobolka gedo ahna maamulaha Dugsiga Hoose/Dhexe ee Degmada Luuq ayaa sheegay in colaaduhu yihiin kuwa ugu daran ee dhabarka ka jebiyey macalinka, sidoo kale xirnaanshaha wadooyinku ay macalimiinta ku ku hayaan caqab ah inaysan dhaqaaqi karin, , wuxuuna sheegay siday tirakoob ku hayaan 2 sano ee ugu dambay say 15 macalin ay tageen shaqooyinkoodii dugsiyada gobolka, kuwaasoo kala aaday xeryaha qaxootiga ee Dhadhaab iyo Magaladda Muqdisho, iyadoo iskuulkii hoose Dhexe ee Ceel cade uu u xirnaa muddo sided bilood ah ahayd intii u dhaxaysay November 2013 ilaa June 2014 macalin la’aan.
Guddiga waxbarashada ayaa sidoo kale sheegay in 4 macalin ay uga tagtay degmada Ceelwaaq markii ay heleen fariimo hanjabaad ah in la dili doono, tanoo ah xad gudub iyo dhibaato loo geysanayo macalinka oo ah barbaariyaha da’yarta, kuna shaqaynaya wakhtigaan mushahar la’aan.
Macalimiinta gobolka ayaa ku shaqeeyo lacago bulshada qurba joogta ahi soo gaarsiiso goobaha waxbarashada, sidoo kale ururo iyana guddaha ka hawl galla ayaa gaarsiiya waxoogaa kaalmo ah, waxaa kaloo jira lacago aan badnayn oo laga qaado ardayda ay qoysaskooda awoodaan inay wax ka bixiyaan oo dhan $5 bishiiba, agabka wax lagu baro carruurta ayaa waxaa bixisa UNESCO oo u soo marsiisa hay’adda UNICEF.
Ibraahim Faarax oo ah kuddiga kormeerka waxbarashada gobolka, hay’adda UNICEFna kala shaqeeya wacyi gelinta waxbarashada gobolka ayaa weriyaha Ergo u sheegay in guud ahaan gobolka ay ka furan yihiin 78 dugsi oo hoose, dhexe iyo sareba ah, waxaana ka hawl gala 300 oo macalin, macalimiintaan ayaa isugu jira kuwo raashin yar ku bedesha shaqaday qabtaan kuwo kalena waxay qaataan inta u dhaxaysa 50 ilaa 100 dollar.
Guddiga waxbarashada gobolka ayaa ugu baaqay dadweynaha inay xil iska saran wanaajinta nolosha macalimiinta iyo ka ilaalinta dhiibaataynta si ay fursad ugu helaan waxbarista carruurt.
Axmed Cumar Saalixi
