Wasaaradda dhalinyarada iyo ciyaaraha Soomaaliya ayaa sheegtay inay wado qorshe ay shaqo ugu abuurayso dhalinyaro ka badan 50 kun, si ay fursad ugu noqoto, abuurista nolosha mustaqbalkooda iyo joojinta ku lug lahaanshaha arrimo ay ka mid yihiin tahriibku.
Wasiirka wasaaradda Qaalid Cumar Cali ayaa sheegay in hadda ay wadaan wacyigalino, ku aadan joojinta tahriibka iyo sidii dhalinta tahriibka ku fekerta xirfado shaqo oo ay meel isaga soo saaraan logu abuurilahaa.
Dhalinyarada wax baratay ee kunool magaalada Muqdisho inta badan waxaa xiligaan haysta shaqa la,aan baahsan midaas oo niyad jab ku beertay dhalinyarada, keentayna inay door bidaan tahriib siduu Ergo u sheegay Cabdiqani Cabdulaahi oo ka mid ah dhalinyarada dhamaysatay jamacadaha Muqdisho haddana aan hayn wax shaqo ah.
Xirfadaha ugu badan ee ay u abuurayaan ayaa wasiirku sheegay inay yihiin sidii loo bari lahaa xirfado ay dhalinyaradu ku shaqayn lahaayeen oo ay ka mid yihiin, farsamooyinka guryaha, kalluumaysiga, beeraha, xoolaha, farshaxanka, korantadda, makaanikada iyo arrimaha kale ee xafiisyadda dawladda oo baahi badan oo shaqaale ka jirto.
Cabdiqani ayaa sheegay in sanadkastaa ay qalin jebiyaan boqolaal dhalinyaro ahi, fursadaha ay haystaanna yar yihiin, qaar ganacsi ayey galaan, kuwo kalena shirkadaha gaarka loo leeyahay ayey u hawl galaan, iyadoon wax shaqo abuur ahi wakhtigaan ka jirin Sooomaaliya.
Wasaradda dhalinyaradda iyo ciyaaraha ayaa sheegtay inay ku dhawaaqayaan bisha Janaayo ee sanadka danbe mashruucaan, ayna hadda isla dejiyeen dhamaan wasaraadihii iyo hay’adihii ka qayb qaadan lahaa,.
