Ilaa 500,000 oo xoolo isugu jira geela, lo`da iyo ariga ayaa koofurta deegaannada Mudug looga daweeynayaa cudurrada xoolaha sida, gooryaanka, shilinta, cudurrada ku dhaca maqaarka xoolaha iyo dhammaan cayayaanka xoolaha cuna.
Ilaa 30 shaqaale oo u tababaran daaweynta xoolaha ayaa fulinaya ololahan oo hadda socday muddo laba toddobaad ah, isla markaana socon doona muddo 45 beri ah.
Daahir Wehliye Aadan oo ku sugan deegaanka Qaranroow oo ka tirsan degmada Hobyo, oo ka mid ahaa dadkii loo daweeyay xoolahooda ayaa sheegay in baahi ay u qabeen daaweynta, “Markii hore aqoon uma lahayn cudurrada ku dhaca xoolaheenna, wayna iska dhiman jireen, sida aniga oo kale ari badan ayaa iga le`day, laakiin hadda intii xanuunsaneydba waa la ii daweeyay wayna ii fiican yihiin.” Ayuu yiri Daahir.
Biyood Faarax Guutaale oo iyadana loo tallaalay tiro ari ah ayaa aad usoo dhoweysay daawyentaas, waxayna sheegtay in xoolahooda abaaraha jira darteed iyo biyo la`aan deegaanka ka jirta ay ku dhaceen cudurro, balse ay haatan aad ugu farxeen daaweyntaas.
Cali Xirsi Cawaale oo kamid ah dhaqaatiira ku howlan daweynta xoolaha ayaa sheegay in shilinta uu yahay cudurka ugu daran ee haatan ay ku arkeen xoolaha, taasoo dishay xoolo badan, dadka reer miyigana aysan aqoonin sida loola tacaalo.
Wasaaradda xannaanada xoolaha iyo daaqa Galmudug iyo hay’adda ICRC oo iskaashanaya ayaana fulinaya ololahan oo ah markii ugu horreysay ee laga fuliyo deegaannadaas, sida ay sheegeen maamulka Galmudug.
Axmed Shariif Cumar Maxamuud oo ah wasiirka caafimaadka Galmudug oo wasaaradda xannaanada xoolaha Galmudug ay u wakiilatay fulinta mashruucan ayaa sheegay inay tiigsanayaan dhammaan deegaannada koofurta Mudug, balse wuxuu caqabad ka muujiyay in daawada aysan ku filneyn dhammaan xoolaha.
“Maaddaama xooluhu ay yihiin isha koowaad ee dadka reer miyiga ah, waxaa muhiim ah inay xoolahooda u helaan daaweyn, sidaa daraaddeed waxaan ka codsaneynaa hay`adaha arrimaha xoolaha inay nagula soo biiraan howshaan, si aan u joogteyno.” Ayuu yiri.
Maxamed Saciid Soomaali/FM
