Roobab muddo 8 saacadood ah si xiriir ah uga da`ay degmada Xudur ee gobolka Bakool toddobaadkii hore, taasoo sababtay in boqollaal qoys oo ay guryahoodii biyo buux dhaafiyeen, qaarna ay dumiyeen ay barakacaan.
In ka badan ilaa lix boqol oo qoys ayaa haatan u barakacay meelaha taagga ah ee gudaha degmada, halkaasoo ay ku haysato hoy la`aan.
Xaawo Maxamed Nuur oo ah 52-sano jir, haysatana 9 carruur ah waxay ka mid ahayd dadkii uu guryahoodu qaaday daadadkii roobka, waxayna Ergo u sheegtay, “ Roobab sidaas u xooggan ma filaneynin, wuxuu buuxiyay dhammaan qolalka gurigeyga, waxayna daadadku la tageen agabkii guriga yaallay iyo raashiinkii, carruurteyda ayaanba si dirqi ah noloshooda kusoo badbaadiyay.” Ayay tiri Xaawo.
Aadan Axmed Maxamuud oo ka mid ah dadka deegaanka ayaa sheegay in degmadu ay ku taallo dhul hoose, oo roobabkuna ay sidoo kale gooyeen waddooyin muhiim u ah degmada, sidoo kalena ay biyo dhigeen iskuulladii degmada oo ay carruurtu guryaha iska joogaan.
Maamulka degmada ayaa gacan ka gaystay soo daad gureynta qoysaskaas, waxaana la geeyay dugsiga sare ee degmada Xudur, kaasoo ah mid dagaalladii ay burbur u geysteen oo aah saqaf kore lahayn oo celiya dhaxanta iyo roobka.
Xuseen Xasan Xuseen oo ah guddoomiyaha xaafadda Sheekh Aweys oo ah xaafadda saameynta ugu daran ay ku yeesheen roobabka, ayaa Ergo u sheegay in degmadu ay markii horeba go`doonsaneyd, taasna ay sii cakireyso xaaladda dadka ka barakacay daadadka, oo siduu sheegay u baahan gargaar cunno iyo hoy degdeg ah.
Muxiyadiin Muxsin/FO
