Ilaa 450 qoys oo beeralley ah oo fatahaadda webiga Jubba ay baabi’isay dalagyadii beerahooda iyo guryahooda ayaa soo gaaray magaalada Kismaayo ee xarunta gobolka Jubbada hoose, kuwaasoo ku tiirsanaa wax soo saarka beeraha
Luul Xuseen Baraka oo 35 jir ah haysatana 7 carruur ah kana soo barakacday tuulada Mashaqo, oo ku teedsan webiga ayaa raadiyaha Ergo u sheegtay in beerteedii iyo gurigeediiba ay qaadeen biyaha ka dhashay fatahaadda webiga Jubba, 15 maalmoodna ay joogto xerayaha dadka barakacay ay ku jiraan ee magaalada Kismaayo oo aan lahayn hoy ay galaan, cunno, caafimaad, biyo iyo caawimaad toona.
Maano Maxamed ayaa Ergo u sheegtay in dhammaan qoyasaskii ku noolaa tuulada Moofi oo iyana ku tiirsan webiga ay ka soo barakaceen kadib markii gabi ahaanba dalagyadii ay beerteen oo isugu jiray Galleey, digir iyo dalagyo kale ay la tageen biyuhu islamarkaana ay dumiyeen guryhii ay ku noolaayeen iyo agabkoodiiba.
“Waxba ma haysanno, xataa dhar la xirto ma wadanno, gaajo ayaa noo dheer oo carruurta wax la siiyo maleh, meeshaanna shaqo ma leh waan iska rafaadsannahay Ayey tiri.”
Cabdulqaadir Xuseen Cali oo ka mid ah qoysas ka soo barakacay tuulada Buulo-yaaq, lehna 8 carruur ah ayaa sheegay in xitaa fatahaaddu ay la tagtay xoolo ari u badnaa iyo digaag, waayo qoyasaska qaar ayaa isugu jiray xoolalleey iyo beeralleey,” Markii hore waxaa saamayn nagu yeeshay roobkii guga ee la waayey oo beeriihii nooma bixin, haddana roobka deyrta ayaaba xaalufiyey intii aan falannay, annagu wax soosaarka beeraha ayaan ku tiirsannahay ,halkan nafta ayaan kula soo cararnay, laakiin nolol ma taallo ayuu ku daray hadalkiisa.”
Guddoomiyaha barakacayaasha magaalada Kismaayo Maxamuud Muuse Cali oo la hadlay raadiyaha Ergo ayaa sheegay in tirada qoysaska ay soo barakiciyeen fatahaadda webiga Jubba ee Kismaayo soo gaaray ay dhantahay 450-500 ilaa 20kii bishii hore, waxaana laga yabaa inay intaa ka badato tirada waayo maalin walba way soo galaan dadka ka soo barakacaya fatahaadda.
Maxamuud ayaa intaa ku daray in qoysasku ka kala yimaadeen tuulooyinka kala ah Buulo-yaaq, Moofi, Mas-aakhirow, Mashaqo iyo Miyuwa oo ah deegaannada xiga dhanka gosha oo Kismaayo u jira 70 KM dhanka waqooyi, Haddana waxay ku sugan yihiin xaalad adag oo uu baahan in loo gargaaro.
Maxamed Sahal Cumar/FO
