Sanado badan kadib ayaa magaalada Muqdisho waxaa lagu arkayaa askar ka tirsan ciidanka qaybihiisa kala duwan oo ku biiraya goobaha waxbarashada sida jamaacadaha, dugsiyada sare iyo goobaha waxbarashada aan nidaamiga ahayn.
Cabdilaahi Maxamed Saciid toddoba sanno ka hor ayuu ku biiray ciidanka booliska soomaaliyeed, xiligaas oo uu soo dhameystay dugsiga sare, hadda waa sodon (30) sanno jir xaasle ah haystana 6 carruur ah, dhawaan ayuu iska diiwaangalshay jaamacad ku taala Muqdisho gaar ahaan kuliyadda cilmiga maamulka bulshada.
Cabdilaahi oo Ergo u waramay ayaa sheegay in waxbarashadu ay noloshiisa muhiim u tahay “bani’aadamku hadduusan wax baran noloshiisu madhameystirna, sidaas darteed ayaan go’aan ku gaaray in aan waxbarto anigoo askari ah, inkastoo mararka qaar ay hakad iga gasho oo aan hawsha qaranka ka doorbido tayda gaarka ah ee waxbarashada.
“Ma doonayo in aan ciidanka ka baxo maadaama anoo askari ah aan waxbaranayo, askari aan waxbaranina ma gudankaro waajibka laga doonayo, si hagaagsan ulama dhaqmayo bulshada, mana hagaajin karo xiriirka bulshada kala dhexeeya, dhammaan ragga ciidanka ah waxaan kula talinayaa inay tacliinta bartaan.
Maxamed Jaamaca Geedi isaguna waa askari ka tirsan ciidanka xoogga dalka Soomaaliya isagoon dhameysan waxbarashadii dugsiga sare ayuu seddex sanno ka hor ku biiray ciidanka milatariga Soomaalia, hadda wuxuu bilaabay inuu luuqadaha carabiga iyo ingiriiska barto, “Haddii aan horay u seegay in aan dhameysto waxbarashadeydii aas-aasiga ahayd ayaan go’aansaday in aan luuqdaha wax ka fahmo, sababtii aan uga haray waxbarashadeydii waxay ahayd ka dib markii dhawr jeer la iga badalay deegaankii aan wax ka baranayay, taasina waxay noqotay caqabad oo adoo imitixaan u diyaarsan ayaa amar ciidan lagugu bedalya oo deegaan kale lagu geynayaa, ” sidaa Ayuu Ergo u sheegay.
“Waan jeclahay waxbarashada, laakiin waan ku guuldareystay in aan waxbarashada dhameysto hada ka hor, waa laga yaabaa in aan dib u bilaabo tacliinta haddii aan dalaco oo aan darajo sare ka gaaro ciidamada qaranka, hadase xaalku waa adagyahay” Acadbulaahi Gureey ayaa oo ka tirsan ciidanka booliska ayaa sida ayiri.
Axmed Cabdullahi Aadan afartan sanno (40) ka hor ayuu booliska ku biiray wuxuuna xusay in ay jiraan caqabado badan oo askartu aysan waxbarasho u gali karin, “askariga ku jira furimaha dagaallka ama jooga xuduudaha ma awoodo in uu waxbarato laakiin kan magaalda iyo meelaha iskuulaadka leh jooga wuu barankaraa oo wakhti ayuu haystaa, “aniga markii aan ciidanka qoranayey waxba ma aqoon laakiin markii danbe ilaa dugsi dhexe ayaan dhamaystay walina ciidanka ayaa ka mid ah gaar ahaan booliska.
Talaabooyinkaan ayaa ah kuwo ku cusub dadka ku jira arrimaha ciidamada Soomaaliya, oo inta badan aan ku fekerin inay isku wadaan tacliin iyo askarinimo
Xamdi Cabdullaahi/FO
