Deeqo Faarax oo ah kalkaaliso caafimaad kuna sugan Garowe, waxay kaga tagtay waxbarashadda fasalka koowaad ee dugsiga sare ee Cumar Samatar kuna yaal Gaalkacayo sanadkii 2007 markay guursatay kadib, laba sano kadib markay wiil dhashay ninkii way kala tageen, waxayna go’aan ku gaartay inay taclintii dib ugu noqoto, halkaasoo ay bilowday macadka tababarka caafimaadka ee Xaaji Cabdi kuna yaal Garoowe, halkaasoo ay 2 sano oo kal kaalisonimo ah kaga soo qalin jebisay, Deeqo hadda waxay ka tirsan tahay kalkaaliyayaasha caafimaad ee Puntland, waxay Ergo u sheegtay in sababaha gabdhuhu ay waxbarashad uga haraan ay tahay guurka xilliga hore oo ay ku khasabto saboolnimada guriga ka jirta, markay guursadaanna ay arrimo cusub ku soo kordhaan naftooda, sida in ay uur yeelato, inay qaado mas’uuliyada reerka oo aysan isku wadi karin laba hawlood.
Bashiir Maxamuud oo ah aabe laba carruur ah dhalay deganna Garoowe ayaa Ergo u sheegay in ragga guursada gabdhaha aysan ku dhiir galin inay sii wataan waxbarashada, Bashiir wuxuu guursaday xaaskiisa iyadoo maraysaa fasalka saddexaad ee dugsiga sarre, haddase wuxuu Ergo u sheegay inuu rajaynayo inuu dib ugu celiyo waxbarashadii si ay qoyska iyo isagaba u anfacdo.
Luul Jaamac Aw Nuur oo ah isku xiraha gobollada ee arrimaha haweenka ee wasaarada haweenka Puntland ayaa Ergo u sheegtay in faqriga uu yahay caqabdda ugu horreysa ee ah in gabdhuhu ka haraan waxbarashada, marka la guursado kadib, hamiga gabadhaha oo aan meel fog gaarsiisnanayn, in qoysasku aysan fahansanayn muhiimadda tacliinta gabadha, xaaladdaha caafimaad, fahamka ragga macaliimiinta ee xaaladaha gabdhaha, tasiilaadka ay heli karaan oo yar.
Waxay intaa ku dartay wacyi galinta iyo doodaha ku aadan barnaamijkan oo loo qabto bulshadu tusin karto cawaaqib xumada ka haysata nolosha gabdhaha aan wax la barin.
Wasaaradda waxbarashada Puntland ayaa sheegtay in sanad dugsiyeedkii 2013 – 2014 ee ardayda dugsiyadda sarre u gashay imtixaankii bishii May ee sanadkaan tiradoodu ahayd 2480, tiradaas oo gabdhuhuna ka ahaayeen 719 gabdhood.
Cabdiraxmaan Xaaji
