Qoysas isgu jira danyar, barakacayaal iyo curyaamiin oo tiradoodu gaarayso 17 kun oo ku sugan gobolka shabeelaha dhexe ayaa ka faa’ideystay raashin deeq ah oo qaybintiisa ay socotay muddo laba todobaad ah.
Cali Cismaan Ibraahim oo ah guddoomiyaha gudi loo xilsaaray qaybinta deeqdan raashinka ah ayaa Radiyaha Ergo u sheegay in 19 tuulood iyo xeryo ay ku jiraan dadka barakacay ay ka qaybiyeen raashinka kuwaasoo ka kala tirsan degmooyinka Jawhar, Mahadaay, Cadale, War-sheekh, Balcad iyo Raago Ceelo, wuxuu sheegay in qoyskiiba la siiyey 50 kg oo bur ah iyo 10 kg sonkor.
Wuxuu sheegay in raashin qaybinta lagu billaabay qoysaska indhoolayaasha, curyaamiinta, qoysaska ay barakiciyeen dagaallada iyo fatahaadda webiga oo loo arkay in xaaladdoodu liidato, qoysaska raashinka loo qaybiyey waxaa ku jira kuwa ku nool xerayaha dadka baracay sida Jawhar iyo Balcad iyo kuwa kale.
Qamaay Cabdulle Shahar waa hooyo naafo ah waxayna ka mid tahay qoysaska loo qaybiyey raashinka deeqda ah, “aniga waxaan la isiiyey 50 kg oo bur ah iyo 10kg oo sonkor xilli aan aad ugu baahnaa ayey i soo gaartay oo hadda in maalmo ah ayaan carruurta u karsanayaa ” Ayey tiri.
Cali Cismaan Ibraahim ayaa sheegay in raashinkan ay ka heleen wasaaradda arrimaha gudaha oo u soo marsiisey hay’adda bisha cas ee Turkiga inkastoo uu sheegay inay jiraan qoysas kale oo u baahan in la gaarsiiyo macaawino laakiin aysan suurta gal ahayn xilligan amniga awgiis.
Maryan Cabdi/FO
