20 May, 2014 MUQDISHOBiyaha ayaa maalintii saddexaad ka go’an xerada Badbaado oo ay ku nool yihiin qoysaskii kasoo barakacay abaartii iyo macluushii 2011 dalka ku dhufatay. Xerada tan ugu weyn magaalada Muqdisho oo ay ku nool yihiin dad ku dhow shan kun oo qoys ayaa horey biyaha uga dhaansan jiray barkad weyn oo xerada ku dhex taal.
Hey’ad maxalli ah oo la yiraahdo Hijra ayaa biyaha u shubi jirtay xerada Badbaado, laakiin qaar ka mid ah dadka ku nool xerada ayaa raadiyaha Ergo u sheegay in Hay’addu ku wargelisay inay hakisay biyaha ay xerada keeni jirtay dhaqaale xumi awgeed. Hey’addu weli si rasmi ah ulama aysan hadlin warbaahinta.
Dadka deegaanadooda kasoo barakacay ee xerada ku nool ayaa hadda ku qasbanaaday inay biyaha kasoo iibsadaan ceelal biyoodyo xerada ka fog. Faadumo Xasan oo ah hooyo 8 carruur ah leh ayaa sheegtay in aysan helin Karin 1000 shilin oo afartan litir oo biyaha lagu iibsado.
“Waxaan dhib ku qabnaa in aan helno cunto aan cunno, iskaba dhaaf in aan heysanno lacag aan biyo kusoo iibsanno,” sidaas waxaa Ergo u sheegtay Faadumo. “Xitaa haddii aan helno lacagta, biyaha nooma dhawa oo waxaan dhabarka uga soo qaadnaa ceelo fog fog,”ayay hadalkeeda kusii dartay.
