Photo | Sawir/Kaydka Cabdulqaair Cabdulle Barakacayaasha ku nool deegaannada Sarkuusta,Tabeellaha Sh Ibraahim, xarunta ciidamada asluubta Garasbaalleey iyo KM13 oo ku yaalla duleedka magaalada Muqdisho, ahna deegaannada ugu badan oo xilligan ay deegaansanayaan barakacayaal isugu jira kuwo ka baxay gudaha magaalada Muqdisho iyo kuwo dhowaan ka yimid deegaanno ka mid ah gobolka Shabeellada Hoose oo colaado ay ka soo cusboonaadeen ayaa sheegaya inaysan heli karin adeegyada caafimaadka, deegaannadaas oo aan xarumo caafimaad lahayn awgeed.
Barakacayaashan ayaa sheegaya in magaalada oo u jirta 10km aysan u doonan karin adeegyada caafimaadka, Xabiibo Aadan waa hooyo leh 4 carruur ah, qaar ka mid ah carruurta ayaa waxaa ka soo ritay xanuunnada Jadeecada iyo xiiqdheerta sida ay u sheegtay raadiyo Ergo “Ma haayo fursad aan gudaha magaalada ugu aado isbitaal, iyaga ayaan nolol maalmeedkooda u raadiyaa.” Ayay tiri Xabiiba.
Caliyow Xasan oo ka mid ah dadkii dhowaan ka soo barakacay deegaanno hoos yimaada degmada Qoryooleey ee gobolka Shabeellaha Hoose, ayaa sheegay in nolosha adag ay u dheer tahay caafimaad darro.
“Hadduu qof uu naga xanuunsado, waa inaad iska sugtaa hadduu geeriyoodo iyo hadduu caafimaadaba, daryeel caafimaad oo aan u heli karno malaha.” Ayuu yiri Caliyow.
Aamina Yuusuf oo ah hooyo leh 6 carruur ah ayaa sheegtay inay carruurteed ku argatay cudurka maqaar cuncunka, iyo cudurrada shuban biyoodka, “Waxaan kasoo barakacnay deegaanno fogfog, halkan baan usoo doonannay nolol wanaagsan, balse hadda carruurtoo dhan baa iga xanuunsan, mana aqaan meel aan geeyo, guriga ayaan isaga haystaa.” Ayay tiri Aamina.
Cabdulqaadir Cabdulle/FM
