Dadka danyarta ah ee xamalka ka shaqeysta gaar ahaan kuwa ku xamaasha gaarigacannada ayaa kala kulma dhibaatooyin dadka ay shaqooyinka u qabtaan, taas oo xadgudub ku ah xaquuqdooda shaqo maadaama ay yihiin dad u nugul in loogu xadgudbo xaquuqdooda, iyagoo nolosha qoyskooda ku mareeya gaarigacannada ay magaalada dhexdeeda kaga xoogsadaan.
Nuur Cabdiraxmaan Cabdi waa abbe leh xaas iyo laba carruur ah waana gaarigacanle nolol maalmeedka isaga iyo qoyskiisa ka raadsada xamaalka gaarigacanka, waxuuna raadiyo Ergo uga warramay dhibaatooyinka uu kala kulmo dadka uu ushaqeeyo.
“ Gaarigacan baan ka shaqeeyaa waxna ka raadsadaa, qutul darruurga ilmaheenna dhibaatadiisuna ma yara dadkuna isku mid maahan, qaar baa kaaga baxaya heshiiskii aad ugu qaaday, iyagoona kuu diidaya lacagtii, haddaad la sii hadashana waxaaba suurto gal ah in qori la guula soo baxo, qaarbaa wajiga kuu badalaya waxana kala kulantaa dhib farabadan ,waad garanaysaa gaari gacanku waa shay yar oo alwaaxa oo la saaro alaab culays badan mararka qaarbuu naga gadoomaa isagoo alaabtii saran tahay wixii kugu jabaana waa dushaada”
Nuur ayaa intaas ku daray in mararka qaar dadka wataa baabuurta ay ka jiirsiiyaan gaarigacanka iyagoo aan wax garowsiiyana aan ku siinayn taaso ka midah xadgudubyada loo geysto dadka ka shaqaysta, hawshaan oo badi ka soo jeeda bulshooyinka la tabaryareysto.
Gaalkacayo oo ah magaalo ay saamayn ku leeyihiin kooxaha burcad badeedda ah, iyagoona la arko markay dhex marayaan magalada hab dhaqankooda gurracan ayaa dadka gaarigacannada ka shaqaystaa yihiin kuwo dhibaato kala kulma“ Burcada badeed wadata baabuur aya iga jiirsiiyey gaarigacankaygii iimana aysan joogsan aniga samaystay booliskana uma dacwoono oo waa naftayada ayaan u baqannaa, haddaan heli lahaa xirfad kale oo aan ku xoogsado maalin keliya kuma shaqeeyeen dhibaatada aan ku qabo darted, gaarigacanku waa kiro oo ma lihin maalin kastana waxan baxshaa qeyb ka mid ah wixii aan soo shaqeeyo” sidaasna waxaa yiri Nuur oo ka cataabaya duruufta adag ee uu ku shaqeeyo.
Xusen Xasan waxa uu kamid yahay gaarigacanalayaasha ku nool Gaalkacyo wuxuuna idaacadda Ergo uga warramay dhibaatooyinka uu kala kulmo dadka ay shaqooyinka uu u qabto.
“ Dadku iskumid maahan qaarba noo diida wixii aan shaqeysanay, hadda aniga ninbaan u qoday musuqul godkeed markii aan marinaayey Labo Mitir iyo bar ayuu ii diiday lacagtii aan kulahaa taasina xaqmaahan qofkuu shaqeeyey oo aad xaqiisii u diiday”
Dadka loo shaqeeyo waxa ka mid ah Mowliid Xirsi Faarax oo aan kula kulmay isagoo gaarigacan saaraya raashin ay u xamaalayeen waxana uu Idaacadda Ergo u sheegay inay jiraan dad aan si wanaagsan ula dhaqmin dadka ku xamaasha gaarigacanlayaasha lakiin isagu uu kamid yahay dadka mararka qaar u qareema gaarigacanlayaasha si uu ugu dhiciyo xaq uu markaas ku leeyahay qof uu u shaqeeyey.
“Waxaa jira gaarigacanlayaal ku hoos nool shirkadayada waxayna raashinka iwm u xamaalaan dadka wax naga iibsada oo ay ka qaataan lacag waxana qaarkood na soo gaarsiiyaan in loo diiday lacagtoodii ay xaqa u lahaayeen, waxana iskudaynaa inay helaan xaquuqdooda shaqo waana jiraan dad ka inkira”
Xasan Cabdi Guure waa xubin ka midah ururrada u dooda xaquuqul iinsaanka Puntland waxuuna raadiyo Ergo uga warramay xogta ay ka hayaan xadgudubyada noocaas oo kale ah, “waa jirtaa in lagu xadgubo dadka xamaasha iyo carrurta kabaha casaysa waana la raadinnaa xaquuqdooda waana arrin xadgudub ku ah shareecada islaamka, xeerarka caalamiga ah ee xaquuqda aadanaha iyo dhaqanka Soomaaliyeedba, waxanan ugu baqaaya bulshadu inay dhaqanka gurrcan ee qof xoogiisa laga inkirayo la iska daayo”:
Burhan Cadeysay/MH
