Ururrada haweenka ee ka dhisan 13 degmo oo ka tirsan maamul goboleedka Puntland ayaa shalay la guddoonsiiyay qalab isugu jira kumbiitarro, kaamerooyin, scan iyo qalab xafiiseed, si ay ugu fududaato soo ururinta, tebinta iyo diwaan gelinta tacadiyadda ka dhanka ah haweenka.
Haweenka deegannadan oo ah iyagu kuwo ka aad uga fogfgo magaalooyinka ayaa qalabkaan waxaa ugu deeqday hay’adda taranka iyo tirakoobka qaramadda midoobay ee UNFPA.
Baxsan Siciid Axmed oo ah madaxa UNFPA Soomaaliya ee Puntland oo haweenka qalabka guddoonsiisay ayaa sheegtay in haweenka aysan qalabkaas hore u heysan, haatanse qalabkan uu wax weyn ka tari doono in xog rasmi ah laga helo tacadiyada ka dhanka ah haweenka oo kufsigu ka mid yahay, kana jira deegaannada Puntaland.
Luul Cabdullaahi oo ka mid ahayd haweenka la gudoonsiiyay qalabkan ayaa sheegtay “Wax weyn buu qalabkan inoo tarayaa, sababtoo ah markii hore ma heysan miisaaska xafiiska, haddaan helno xogag kufsi ku saabsan telefoon baan ku wargelin jirnay hay`adaha ay quseyso iyo wasaaradda haweenka Puntalnd, mararka qaar isticmaalka kumbiitarka iyo scan-ka magaalada ayaan usoo doonan jirnay oo gaari baan soo raaci jirnay, balse hadda waan ka reysaneynaa.” Ayay tiri Luul.
Luul Jaamac Samatar oo ah xiriiriyaha wasaaradda haweenka ee gobollada iyo degmooyinka Puntland ayaa sheegtay in qalabkan uu yareyn doono xogaha qaldan ee ku saabsan tacadiyadda haweenka loo geysta oo hay`adaha ay kasoo uritiyaan deegaannadaas.
Xaliimo-sacdiyo Cabdullaahi Cali/FM/AM
