Sokorey: “ In xilligan qofkii aan dooni heli Karin uu xaalku ku adag yahay”
Dadka ku dhaqan tuulada Xawaadleey oo ka tirsan degmada Balcad ee gobolka Shabeelada Dhexe ayaa ka cabanaya dhibaatadii ay ku reebeen fatahaadihii ay roobabka iyo webiga u geysteen. Dadkan ayay dhibaato ka haysataa isu socodkii gaadiidka iyagoo ay ku kalliftay iney isticmaalaan doonyo yaryar si ay u raadsadaan maciishaddooda. Tuuladan oo ay ku nool yihiin dadka ka badan 5000 oo qof afartan kiiloomitirna ka xigta demada Balacad dhanka waqooyi ayaa iminka ka go`an muddo labaatan maalmood ah degaannada kale ee gobolka shabeellada Dhexe.
Yuusuf Xasan oo kamida ah dadka deegaanka oo la soo xariiray radio Ergo wuxuu sheegay in xilligan xaalka deegaanka uu yahay mid adag dadkuna ay aad u saamaysay dhibaatadan, iyadoo ay ka baaba`een dalagyadii ay goosan jireen “Waxaan ku baaqaynaa in codkayaga uu radio Ergo gaarsiiyo inta kaalmeysa dadka dhibaatada hayso, waxaan u baahanahay in nalaga taageero nolosha xitaa ha ahaato qalab aan ku kaluumaysanee” ayuu yiri Yuusuf
Sokoreey Ibraahim waa hooyo ku nool tuulada Xawaadleey waxa ayna sheegtay in xilligan ay nolosha ay adag tahay in dadka ay ku yimaadaan doonyo qofkii aan doon heli karin uu xaalka ku adag yahay, dadka qaarna ay u barakaceen Gaalkacayo iyo dhinacaas, qaar kalena Muqdisho iyo gobollada dhexe arrimahaasi.
Mid ka mid ah odayaasha deegaanka kana gaabsaday magaciisa ayaa yiri” Biyuhu waxay dhamaan tuulada ka go’doomiyeen wax kasta, in ka badan laba toddobaad ayey dhex qotomaan tuuladda, habka keliya ee lagu soo gaari karanaa waa doon, bulshada calamkana in naloo soo gurmado ayaan ka codsanaynaa” ayuu yiri odeygaas
Qaar ka mida dadka deegaanka ayaa sidoo kale waxa ay sheegeen in qiimaha raashinka oo daadka sida bariiska oo kale oo ahaa daadka ka hor 12 kun oo shillin hadda uu yahay 18 kun, dadkuna ay fara maran yihiin, goobihii ganacsigu waa xirmeen, daligii beeruhu guud ahaan waxaa qaaday daadka.
Roobabkag Gu`ga ee waxyeellaada ka geystay degaanno badan oo webiyada ku teedsan ayaa soo bilowday bishii Maarso ee la soo dhaafay, waxayna kallifeen iney dhulbeereedyo iyo degaanno kaleba ay wax yeelleen. Dhibaatada fatahaadaha ayaa ka noqday Soomaaliya kuwo soo noqnoqda oo aan taxaddar loo yeelan xilliyada roobabka ka sokow, iyadoo welibana hay`adaha saadasha webiyada iyo roobabka sida SWALIM ay ka soo saareen digniino aanan sidii la rabay ayan dadku uga faaiideysan.
Abdulkaadir Abdulle/MH
