Ururka curyaaminnta gobolka Shabeellaha Dhexe ayaa ka cabanay sida ay u dayacan yihiin iyadoo ay taasina ugu wacan tahay iyagoo sheegay ineyan jirin cid kaalmeeysa. Sidii ay Al Shabaab u hor istaagtay kaalmooyinkii ay bixin jireen hay`adda WFP iyo kuwa kale ee samafalka ee ka hawlgeli jiray deegannadan ayaanan wax dib u soo eegay dadka lixaadka la` ee ku nool gobolkan, iyadoo ay Al shabaab ka mamnuucday afar sano ka hor iney WFP ka hawlgelin Shabeellaha Dhexe iyo goobo kale oo ka mid ahaa meelihii ay Al shabaab gacanta ku hayeen.
Dadkan curyaamiinta ah ee ku nool Shabeelle Dhexe ayaa tiradooda lagu sheegay ilaa 240 sida uu u xaqiijiyay guddoomiya naafada Jowhar Cumar Maxamed Miisee raadiyo Ergo. Weriyaheenna Jawhar Maryan oo tagtay goobta curyaamiinta ayaa waxay sheegtay inay halkaas ku aragtay dad diifi ka muuqato oo safnaa afaafka hore ee xafiiskooda, waxeyna isugu jireen rag, dumar iyo carruur.
Dadkaan oo isku urursaday guri ay ku kulmaan oo ay kireysteen kiro ayaa waxaa ka hadlay, guddoomiyaha dadka naafada ah ee Jowhar Cumar Maxamed Miisee wuxuuna yiri “Xaaladdeennu aad bay u xuntahay, waxaan nahay dad masaakiin ah ee aan waxna haysan waxna qabsan karin, afar sano ka hor hay’adaha gargaarka ayaa wax na soo gaarsiin jirey, waxayna taas dhamaatay markii Al shabaab u diiday iney ha`daha samafalka qaarkood ayan ka hawlgelin dhulkan”
Farxiyo Cilmi oo haysata gabar yar oo toban sano jir ah oo dhammaan addimada la` oo heshey gargaar aan badnayn oo ay ugu tabarucday sharikadda isgaarsiinta Hormuud ayaa waxay raadiyo Ergo u sheegtay iyadoo leh” Abaayoy xaladayda aad bay u liidataa, waxaan haystaa gabar curyaanka ah, agoonna ah, waxna ma cunayso, saxarada xitaa ma ogaanayso, ma soconayso ma fariisanayso, waa inaan dusha ku sido, ma shaqayn karo oo iyadaan 24 saacba sidaa, waxaan codsanayaa in gargaar la i siiyo”.
Dadkan oo u badan kuwa da` ah, ayaanan ahayn kuwo xoogsan kara ama xirfado yeelan kara, iyagoo qaarkood ay ku nool yihiin xeryaha barakacayaasha oo iyaguba la daalaa dhacaya mashaakilaadkooda, halka ay qaarkoodna intey is bahaysteen ay guryo magaalada ka kireysteen isagana bixiyaan wixii ay soo dawarsadaan. Waxayna ka codsanayaan .
Maryan Cabdi/Jowhar
