Soomaaliya waxaa xornimada u horseeday halgan gobonnimo-doon ah oo hormuud ay u ahaayeen dhalinyaro saddex iyo toban qof ah oo kala qabaa’illo duwan oo da’doodu ay u dhexeysay 16 jir ilaa 33 jir. Midkoodna jaamici ma ahayn.
Waxaa hubaal ah in dhalinyarada maanta joogta uu horyaallo hal-xiraale ay u dhigeen saddex iyo tobankaas dhalinyaro. Waxaa la eegayaa sida ay xil isaga saari doonaan samatabixinta Soomaaliya oo noqotay deegaan colaadeed saddex iyo konton sano kaddib xornimadeedii. Dhalinyaradii dalka ka qaxday baa qaarkood meydkooda lagu jiidayaa waddooyinka dalka Koonfur Afrika, qaarkood waxay ku halaagmeen badaha adduunka iyagoo tahriibaya, qaarkoodna waxay ku jiraan xabsiyo ku yaalla dalal shisheeye oo aan la hubin inay nolol uga soo bixi doonaan.
Xuska maalinta dhalinyarada Soomaaliyeed oo loo aqoonsaday maalintii la aas-aasay SYL oo ku beegan 15-ka May sanad weliba heesaha, ciyaaraha, damaashaadka iyo maaweelada loo sameeyo marnaba ma furi karaan hal-xiraalahaas horyaalla dhalinyarada Soomaaliyeed ee maanta nool.
Haddaba, lifaaqan hoose ka dhegeyso barnaamij gaar ah oo uu weriyaha Ergo Muxyaddiin Axmed Rooble ka diyaariyy isbarbardhigga dhalinyaradii SYL iyo kuwa maanta iyo kaalinta u furan si ay u damiyaan dabka colaadda ee labaatan sano ka badan weli ka sii huraya gobollada dalka qaarkood.
MR/FM
