Dib u howl billaabidda ceelkan oo ku yaalla meel ka baxsan magaalada Laascaanood ayaa waxaa iska kaashaday hay`daha NPA iyo ururka maxalliga ah ee SRO.
Ceelkan oo muddo saddex sano ah u fadhiyay cillad haysatay ayaa dib shaqadiisii u billaabay kaddib dadaal ay sameeyeen hay`ado maxalli ah oo suurtageliyay in ceelkan uu kaco.
Cabdirishiid Jaamac Biixi oo ka tirsan ururka SRO ayaa sheegay in ceelkan kicintiisa ay faa`iido badan u leedahay dadka iyo duunyada oo ay haysato dhibaato biyo yaraan. Madaxa hay`adda NPA ee gobolka Sool Shkuri Xasan ayaa sheegtay inay ka jawaabeen baaqii qaylo dhaanta ahaa oo ay horey ugu soo direen dadka deegaanka, maantana ay howlgeliyeen ceelkan.
Hay`adahan NPA iyo SRO ayaa ka sokow hirgelinta ceelkan, waxay biyaha u daadgureyn doonaan dadka ay biyo la`aantu haysato, kuwaasoo aanan awoodin inay ceelkan biyo u soo raadsadaan.
Tallaabadan ayaa soo dhoweeyay dadka deegaanka oo sheegay inay ku aadday xilli xaalado abaaro iyo biyo yaraan ay ka taagan yihiin deegaannada ka tirsan Laascaanood. Gudoomiyaha gobolka Sool Maxamed Faarax Aadan ayaa u mahadceliyay hay`adaha hirgeliyay ceelkan.
Guddoomiyaha ayaa ugu baaqay hay`adaha kale inay kaalmo mucaawinooyin ah la soo gaareen dadka oo uu sheegay inay ku jiraan xaalad adag oo ka dhalatay abaaraha.
Dib u howl billaabidda ceelkan ayaa waxay ku soo beegmaysaa iyadoo guud ahaan ay fadhiyaan ceelasha ku yaalla magaalada laascaanood, kuwaasoo ay kamid yihiin Goojacadde, dhuxun, Ceel Quule iyo Durdurka Laascaanood .
Abdikariim Olol/MG/FM
