Waxaa isa soo taraya cabashooyin la xiriira qalaalasaha ka taagan qiimaha sarrifka doollarka oo gaaray heerkii ugu hooseeyay, iyadoo qiimaha maciishadda ay sare ugu kacday qeybo badan oo ka tirsan dalka.
Soomaaliya waxaa si weyn looga isticmaalaa lacagta doollarka Mareykanka. Lacagata shilinka Soomaaliga oo suuqyada ka sii baxaya ayaana ka mid ah waxyaabaha dad badan ku qasbay inay ku tiirsanaadaan doollarka.
Magaalada Muqdisho ayaa kamid ah goobaha dalka sida weyn looga dareemay jahwareerkan, tanoo si adag u saamaysay dadka saboolka ah oo qiimaha cuntada ay sare ugu kacday.
Mid kamid ganacsatada ayaa idaacadda Ergo u sheegay “Walaal doollarkii hoos ayuu u dhacay, mana jiraan wax isdhimis ah oo laga dareemay cuntada, tan ayaana ah mid qof walba uu ka walwalsanyahay” ayuu yiri.
Ninkan iyo dad badan oo lamid ah ayaa tan iyo toddobaadkii hore dabayaaqadiisii dhabannada wada haystay. Amuurtan ayaa waxay soo jiidatay dareenka fadhiyadii baarlamaanka iyo wasiirrada iyo hay`adaha kale ee dowladda ee maalmihii la soo dhaafay, waxaanayna arrintan isu beddeshay mid tixgelin goonni ah leh, marka loo eego ajandayaashii kale ee horyaalaly fadhiyadooda.
Guddoomiyaha gobolka Banaadir Maxamuud Axmed Nuur Tarsan oo la hadlay idaacadda Ergo ayaa sheegay in dhibaatadan ay ku timid ganacsatada qaar oo billaabay inay lacagaha shilin Soomaaliga ah xareystaan, si ay faa`iido badan uga helaan hoos u dhaca sarrifka. Tarsan ayaa ka digay in dalka ay ka dillaaci karto macluul.
Madaxweynaha Soomaaliya Xasan Sheekh Maxamuud ayaa isaguna baaq dheer u diray caalamka si ay u soo farageliyaan mashaakilkan, isagoo ugu baaqay inay dalka keenaan raashiin lagu jebiyo sicirka cuntada, maaddaama aysan dad badan awoodin inay wax iibsadaan, tanoo horseedi karto xaalad adag inay wajahaan dad badan.
Dadka Muqdisho waxay waayahii ugu dambeeyay dareemayeen neecaaw nabadeed oo aysan haysan muddo ku dhow 22 sano, balse nimco waliba nusqaanteeda hadda waxay dareemayaan dhibaatadan adage ee noloshooda halis gelin karta.
Yusuf Keynaan/MG/FM
