Wafdi ka socday dowladda Turkiga oo booqday qaar ka mid ah xerooyinka qaxootiga Soomaaliyeed ay kaga jiraan waddanka Yemen, ayaa sheegay inay horumarinayaan waxbarashada qaxootiga Soomaalida ee ku sugan xeryahaasi.
Wafdigaan oo ka koobnaa illaa laba qeybood ayaa qeyb ka mid ah waxay ka soo kicitimeen magaalada Geneva ee waddanka Switzerland, halka qeybta kale ee wafdigana ay ka yimaadeen waddanka Turkiga.
Wafdigaan ayaa kormeer iyo indha-indhayn ku soo sameeyay xeryaha ay qaxootiga Soomaalidu kaga sugan yihiin dalkaasi Yemen, iyagoo sidoo kale booqday xarunta weyn ee hay`adda UNHCR ku leedahay magaalada Cadan ee waddankaasi Yemen .
Cabdifataax Maxamad Axmed oo k amid ah ardayda ku sugan waddankaasi Yemen isla mar ahaantaana ka mid ahaa arday Soomaaliyeed oo wafdigaasi kulamo la qaatay, ayaa idaacadda Ergo u sheegay in wafdiga ay kala hadleen sidii loo soo xuli lahaa illaa 150 arday Soomaaliyeed oo dawladda Turkigu uga fidineyso deeq waxbarasho gudaha waddankaasi Turkiga.
Waxay sheegeen wafdigu in dowladda waddanka Turkigu ay ka go`antahay sidii ay u horumarin lahayd waxbarashada ardayda Soomaaliyeed ee ku sugan Yemen, ayuu yiri Cabdifataax oo intaasi ku daray in shuruudo ay ku xireen inti aan la qaadin ardaydaasi taasoo ah ayuu yiri in waalidiinta ardaydaasi laga doonayo inay saxiixaan lana socdaan dhaqdhaqaaqa ardayda.
Si kastaba ha ahaatee waa markii ugu horreysay ee wafdi ka socda waddanka Turkiga uu booqdo xeryaha qaxootiga Soomaalida ay kaga jiraan waddanka Yemen, kuwaasoo misna ballanqaada inay horumarinayaan waxbarashada qaxootiga Soomaalida Yemen, balse ma ahaan markii ugu horreysay ee ay dowaladda waddanka Turkigu deeq waxbarasho ugu yaboohdo arday Soomaaliyeed.
MG/AA/FM
