Waxaa wali muuqanaaya raadadkii ay reebeen dagaaladii ugu dambeeyay ee ka dhacay magaalada xarunta u ah gobolka Galgaduud ee Dhuusa mareeb,waxaa wali xiran oo aan shaqaynin xarumihii waxbarashada iyo gooba ganasi oo ay ku noolaayeen dad badan oo kamid ah dadka ku nool magaalada Dhuusa mareeb ee gobolka Gal gaduud, Dagaaladan oo joogta ka noqday gobolka ayaa cuuryaamiyay noloshii iyo ganacsigii dadka rayidka ah mana jiraan ilo ay dadku ka helaan nolol maalmeedka.
“Waxaa kala go,ay khudaartii aan iibin jirnay ,ma jiraan dad wax naga iibsada ,ganacsigeenu waxaa uu noqday mid gaabis ah waxaana taasi ugu wacan dagaalada ku soo noqnoqday magaalada”sidaana waxaa idaacadda ERGO u sheegtay mid kamid ah haweenka ka ganacsada qudaarta degmada Dhuusa mareeb, haweeneydaan ayaa intaasi sii raacisay in ay ka codsanayaan dhinacyada ku dagaalamaya magaalada in ay dagaalada ka joojiyaan si dadku ay u helaan fursad ay ku ganacsadaan si ay u noolaadaan.
Badi shacabki deganaa degmada waxaa ay u carareen magaalooyin ay kamid yihiin Caabud waaq, Guriceel,Xanan buure,iyo goobo kale mana jiraan cid aan wax ka iibino sidaana waxaa Radio ERGO u sheegtay Xaawa Cabdulle Barre oo iyadu kamid ah haweenka meherada ganacsi ku leh degmada Dhuusa mareeb ee xarunta gobolka Gal gaduud.
Sidoo kale kale degmada dhuusa mareeb waxaa xirmay xarumihii waxbarashada eek u yaalay degmada sababa la xirrira dagaalada ku soo noqnoqday halkaasi ardaydii wax ka baran jirtay dugsiyadana waxay u qaxeen goobo ka baxsan magaalada si ay dagaalada uga badbaadaan, wariye katirsan idaacadda ERGO oo booqday halka loo yaqaano Laanta dheer oo qiyaastii magaalada Dhuusa mareeb dhanka bari kaga toosan 10km ayaa waxaa uu halkaasi kula kulmay qaar ka mid ah ardaydii wax ka baran jirtay dugsiyada ku yaala degmada Dhuusa mareeb waxaana uu sheegay in ardaydii uu halkaasi kula kulmay ay ka muuqatay baahi waxbarasho isagoona soo sheegay in ardaydaasi ay dhammaantoodba codsanayeen in dib loogu furo xarumahoodii waxbarasho.
“Dhibaatada ugu weyn ee shaqsi ahaan aniga I haysata waxay tahay dugsigii sare oo aan ii dhamaanin ayay dugsiyadii naga xirmeen, Nolosha meeshaan waa baadiyo biyo mala,han magaalada marki aan joognay waxaan ka heli jirnay meel aan kaga gabano xabadda laakiin halkaani malahan oo waa banaan ”sidaana waxaa ERGO u sheegay Kamaal Maxamad Cali ,oo ka mid ahaa arday uu wariyaheenu kula kulmay halka lagu magacaabo Laanta dheer.,
Lama qiyaasi karo dhibaatada ay shacabku qabaan waa dagaalo qaab daran oo marba dib u soo laabanaya kuwaasoo dadka ku qasbay in ay ka cararaan magaalada inta kale eek u hartayna ay noqdaan kuwa cabsi ku jooga ,laakiin waxaan rajaynaynaa in uu ALLAAH naga idleeyo colaada ,si aan nabad iyo barwaaqo ugu noolaano dhulkeena sidaasina waxaa ERGO u sheegay Nabaddoon Ciise Maxamuud Maxamed oo isagu ka mid ah waxgaradka ku dhaqan magaalada Dhuusa mareeb ee xarunta gobolka Gal gaduud.
Si kastaba ha ahaatee ku dhawaad muddo afar sanadood ah waxaa degmada dhuusa mareeb ku soo noqnoqonay dagaalo u dhexeeya dhinacyo ku loollamaya gacan ku haynta gobolka, dagaaladaasoo sababay qasaarooyin isugu jira dhimasho, dhaawac, barakac iyo burbur hantiyeed.
Cabdijamaal Macalin Axmed/MG/AA
