Sida ay warbixin ku soo saartay xafiiska isku dubbaridka arrimaha bani’aadannimo ee OCHA xannibaaddii ururka Alshabaab ku soo rogeen hay’adaha ka shaqeeya gargaarka iyo ammaan darrida jirta oo sii kordhaysay.
toddobaadkaan ayaa hakad gelinaya gurmadka loo samaynayo dadka baahan, 28-kii bishaan qarax ayaa ka dhacay cisbitaalka dhallaanka iyo hooyada ee Banadir kaasoo ay ku dhawacmeen 7 carruur ah, 27-kii bishana 12 qof ayaa ku dhintay laba qarax oo ka kala dhacay degmooyinka Yaaqshiid iyo Kaaraan, 30 November ayaa isaguna qarax kale lala eegtay xarunta taliska ciidanka Soomaaliya ee Villa Baydhabo halkaasoo qof is qarxiyey ku galaaftay nolosha 8 qof, isla shalay sidoo kale qarax kale oo miinada dhulka la geliyo ahayd ayaa ka dhacday xaafadda Dharkenley taasoo dishay 7 haween oo ka mid ahaa kuwii hawlaha nadaafadda ka shaqaynayey.
Dhinaca gobollada Jubbooyinka iyadoo ay weli socdaan hawl gallada ciidanka Kenya ayaa tiro aan la caddayn oo dad ahi ku dhinteen, sidoo kale wararka ka imanaya gobollada Jubbooyinka ayaa tilmaamaya in dadkii shicibka ahaa ay billaabeen inay ka cararaan tuulooyin badan.
Dhammaan hawl galladaan ciidamada Kenya waxay xannibayaan dadaalladii lagu gargaari lahaa bulshada baahan, hay’ad ka mid ah kuwa gudaha ka hawl gala kana shaqaynaysay gobollada Jubbooyinka ayaa war saxaafadeed ay soo saartay ku sheegtay in gebi ahaanba hawlaheedii gurmadka dadka baahan ay xannibeen dagaallada socda, uuna dib u dhacu sii socon doono.
28-kii November ayaa ururka Alshabaab, xannibaad ku soo rogeen hay’adihii qaramada midoobay, kuwa caalamiga ah iyo kuwa gudaha ee ka shaqaynayey arrimaha gargaarka bani’aadannimo kana hawl galayey gobollada ay maamulaan ururkaani, sido kale waxaa la xannibay qalabkii iyo xafiisyadii ay ku shaqaynayeen hay’adahan, xooghayaha guud ee qaramada midoobay Ban kimoon iyo u qaybsanaha isku dubbaridka arrimaha bani’aadannimo Valarie Amos ayaa iyaguna baaq ay soo saareen ku codsaday in xayiraadda laga qaado hay’adahaan, ayna Alshabaab ka baxaan xafiisyada hay’addahay qabsadeen (Riix) , aysan wax macno ah u keenayn xannibaaddoodu sidii loo gargaari lahaa dadka baahan ee la doonayey in la tiigsado sanadkaan, ayna arrintaani keenayso oo keliya inay macaluushu ku soo noqoto meelo badan.
Waxyaabaha kale ee dhibaatooyinka ku ah gurmadka dadka baahan ayaa ah sidii loo geyn lahaa goobaha cunto tayo sare leh, oo dhinaca nafaqaynta ah si loo daboolo baahiyaha, sidoo kale waxaa xannibaado kale ah waddooyinka oo liita, xilli roobaad lagu jiro ka sokow ammaanka gobollada Koonfureed waa dhibaatooyinka hor taagan gargaarka bani’aadannimo.
Baahida dhinaca caafimaadka ayaa OCHA sheegtay in 3.7 milyan oo qof ay u baahan yihiin gargaar.
MH
