Ku dhowaad Saddex boqol oo gaadiid ah oo ay ku jiraan kuwo xamuul ah oo qaarkood ku wajahnaa gobolka Gedo iyo dalka Itoobiya, ayaa ku xanniban wadada isku xirta degmada Waajid iyo Baydhabo.
Gaadiidka qaarkood oo ay saaranyihiin cunno gargaar ah oo loogu talagalay qoysas dhowaan dib loogu celiyay deegaanandooda, ayaa ku xanniban deegaanka Goof Gaduud oo ka tirsan degmada Baydhabo tan iyo bartamihii bishan, markii roobab mahiigaan ah ay ka da’een degmooyinka iyo tuulooyinka gobollada Bay iyo Bakool.
Darawallada gaadiidka qaarkood oo telefoonka ugu warramay Raadiyaha ERGO, ayaa sheegay in ay jiraan in ka badan saddex boqol gawaari u badan kuwo xamuul ah oo ku xanniban wadada xiriirisa Baydhabo iyo Waajid.
Liibaan Sheekh oo ka mid ah darawalladaas ayaa sheegay, in qaar kamid ah baabuurta yar yar iyo kuwa fudud ay ka gudbeen wadada dhanka Waajid balse kuwa xamuulka ah oo badeecooyin sida ay adagtahay in ay gudbaan inta roobabku ay da’ayaan.
Marka laga soo tago dhanka Waajid, waxaa jira gaadiid kale oo gaaraya ku dhowaad laba boqol kuwaasi oo sidoo kale ku xayiran deegaanka Manaas oo u dhow degmada Diinsoor.
gaadiidka ku xayiran Manaas, ayaa waxaa qeyb ka ah kuwo cunno iyo badeeco u wada Gobolka Gedo, waxaana gaadiidka la socda ganacsato inta badan ku safarta gobollada Bay, Bakool iyo Gedo.
Arrintan waxaa loo sababaynayaa waddooyinka oo raf ah iyo roobabka oo biyo xoog badan wata isla markaana xiray dhammaan waddooyinka ay maraan gaadiidka, waxaana taasi ay keentay in ay hakad galaan dhaq dhaqaaaqa gaadiid badan oo ku wajahnaa gobollada deriska la ah gobolka Bay.
Hakadkaan ku yimid gaadiidka ayaa keenay in qiimaha raashiinku sare u kaco, gaar ahaan goobaha ku teedsan xuduudka Kenya, Itoobiya iyo Soomaaliya oo badi noloshoodu ku xirnayd ganacsiga ka yimaada Muqdisho.
Deegaannada Dhadhaab, Ceel Waaq iyo Mandheera oo ka tirsan gobolka waqooyi bari Kenya, ayaa raashiinku uu gaaray qiimo aad u sarreeya Sidoo kale colaadaha hadda ka aloosan Gedo iyo Jubbada Hoose ayaa iyaguna qayb ka ah inuu istaago dhaqdhaqaaqii ganacsiga.
Cabdicasiis/MH
