(ERGO) – Cabdi Guhaad Axmed oo 62 jir ah ma uusan filayn inuu ku biiri doono xero barakac ah markii uu ka soo hayaamayay tuulada Karban ee gobolka Gedo bishii Oktoobar ee 2021-ka. Wuxuu la soo hayaamay qoyskiisa oo ka kooban sagaal carruur ah, kaddib markii ay abaarta ka laysay 300 oo ari ah iyo 30 neef oo geel ah. Rajadiisu waxay ahayd inuu bad-baadsado xoolihii u soo haray markii uu usoo hayaamayay degmada Doolow.
Balse, boqollaal qoys oo xoolo-dhaqato ah ayaa isugu tagay baad yar oo laga helay degmada Doolow, taas oo keentay inuu durba ka dhamaado.
Cabdi waxaa ka dhintay 70 neef oo ari ah oo uga soo haray xoolihiisa bishii Diseembar ee sanadkii la soo dhaafay. Arrintaas ayaa horseedday in qoyskiisa uu kula biiro xerada barakaca ee Qurdhubey oo ay hadda ku haysato hoy-xumo, cunto-yari iyo biyaha ay heli karaan aan nadiif ahayn.
“Duruuf ayaa i haysata, meel aan uga dhaqaaqana ma leh, meelaan dib ugu noqdana ma laha. Ma gaari karo meeshii aan ka imid, haddii aan ku laabto lafteeda wax nolol ah oo iga dambeysa ma jiraan,” ayuu yiri Cabdi oo markiisii ugu horreysay barakac noqday.
Waxaa hoy u ah aqal uu ka sameeyay ulo uu ka soo goostay geedka Cali-garoobka iyo teendho dhamaad ah oo uu kala yimid deegaankiisa.
Cabdi wuxuu tilmaamay in noloshooda ay ku tiirsan tahay shaqo beer-falid ah oo isaga, xaaskiisa iyo labadiisa gabdhood ay si wadajir ah u qabtaan. Waxay helaan maalinkii ay beerta soo falaan 100 bir oo u dhiganta $1.5, taas oo ay ku soo iibsadaan raashin ay maalinkii halmar karsadaan.
Xaliimo Maxamed Sheekh oo ah hooyada toddobo carruur ah oo agoon ah ayaa sidoo kale ku biirtay xerada Qurdhubey, markii ay abaarta uga dhamaadeen xoolaheedii. Waxay Raadiyow Ergo u sheegtay inay biyaha ka soo aroortaan webiga Jubba oo labo kiilo mitir u jira. Balse, biyahan ayay sheegtay inay yihiin kuwo aan nadiif ahayn oo dhoobo ah.
“Wixii dhabarka lagu soo dhaamiyaa waaba dhoobo sideeda ah oo iska fadhida. Waxba laguma karsan karo, laguma weysaqaadan karo, laguma waji dhaqan karo. Habeen dhoweeto ayaa gabadhii reerka u rooneyd oo soo dartay biyo ayaan iri ‘hooyo shaah noo kari’, ‘biyihii saan waaye’ ayay tiri; biyihii carro waaye. Raashinkii habeenkii waan ka qadnay,” ayay tiri.
Xaliimo oo 56 jir ah waxay ka soo guurtay miyiga tuulada Diidacanaani oo hoostagta gobolka Afdheer kaddib markii ay abaarta uga la’deen 35 neef oo ari ah.
Qoyskeeda ayaa hadda ku tiirsan lacag yar oo ay ka hesho xaabo ay duurka ka soo uruuriso.
Guddoomiye ku-xigeenka degmada Doolow, Aadan Barre Cali oo la hadlay Raadiyow Ergo ayaa sheegay in qoysaskan ku nool Qurdhubey ay yihiin xoolo-dhaqato abaar uga soo guuray gobollada Bakool, Dowlad-deegaanka Soomaalida iyo qeybo gobolka Gedo ah, kuwaas oo xoolihii ay la soo guureen ay ka dhamaadeen. Wuxuu sheegay in maamulku uu ku caawiyay dhul bannaan oo ay dowladdu leedahay oo ay degaan. Wuxuu intaas ku daray in uusan jirin gargaar ay heleen, maamulkuna uusan u awoodin.
Aadan ayaa tilmaamay in tan iyo bishii Sebtember ee sanadkii hore ay soo gaarayeen Doolow qoysas kale oo xoolo-dhaqato ah. Wuxuu sheegay inay ku biireen xeryaha dadka soo barakacay ee magaalada oo kala ah Kabaaso, Qansaxley iyo Qurdhubey.
