(ERGO) – Qoysas xoolo-dhaqato ah oo ku nool gobolka Hiiraan ayay dantu ku khasabtay inay carruurtooda ka reebaan iskuulladii ay dhigan jireen si ay xoolahooda uga badbaadsadaan abaarta.
Cabduqaadir Cali Iidow, oo ah aabbaha siddeed carruur ah, wuxuu qoyskiisa kala barakacay abaarta ka jirta tuulada Jiracle. Wuxuu hadda joogaa tuulada Garasta ee degmada Maxaas. Saddex ka tirsan carruurtiisa oo u dhiganaysay dugsiga hoose-dhexe ee Cismaaan Maalin oo ku yaalla Jiracle ayaa hadda waxbarasho-la’aan ah.
“Xoolaha ayaan ku noolaa oo aan isticmaalayay, iyagaan waxbrashada iyo biilka uga bixin jiray. Maaddaama xaaladda ay xumaatay oo deegaankii ay roob ka waayeen iyagiina xoog waa looga maarmi waayey. Noloshii xoolaha maaddaama ay ku baaba’ayso, sidaas ayaa looga raray meesha, carruurtiina looga waday,” ayuu yiri.
Ninkaan iyo qoyskiisa waxay biyaha ka iibsan jireen booyado biyaha keena deegaanka oo aan ceel lahayn. Fuustada biyaha ah oo ay booyaduhu iibinayeen afar doollar ayuu sheegay inuu awoodi waayay gadashadeeda. Taas ayaa ku khasabtay in 200 oo neef oo ari ah iyo 59 geel ah uu ula hayaamo tuulada Garasta.
“Waxaa ii qorshe ah inaan iskuulka dib ugu soo celiyo oo ay wax ii bartaan haddii uu roob da’o oo xaaladda sidii la rabay uu Alle ka dhigo. Waxaan dareemayaa in waxabarashada ay [waxtar] leedahay oo iftiinka ummadda ay tahay,” ayuu yiri.
Hase ahaatee, shan ka tirsan carruurtiisa waaweyn ayaa wali wax uga baranaya dugsi sare iyo Jamacad ku taalla magaalada Beledweyne.
Khaliif Xasan Axmed, maamulaha guud ee iskuulka hoose-dhexe ee Cismaan Maalin ee deegaanka jiracle ayaa Raadiyow Ergo u sheegay in 70 ka tirsan 320-kii arday ee dhiganaysay iskuulka ay la hayaameen waalidiintooda.
Macallin Khaliif ayaa xusay in xilligaan ay dareemayaan welwel la xiriira sii joogista ardayda hadda iskuulka dhigata ee deegaanka ku hartay haddii ay abaartu sii darsato, maaddaama ay iyagana ka soo jeedaan qoysas xoolo-dhaqato ah.
Wuxuu tilmaamay in qaar ka tirsan macalimiinta iskuulka oo iyaga naftooda ah xoolo-dhaqato ay ula hayaameen xoolahooda deegaannada ay daruuruha ka da’een.
Maxamed Cismaan, oo ah aabbaha toddobo carruur ah, wuxuu qoyskiisa kala soo barakacay deegaanka Beergadiid ee degmada Matabaan dhamaadkii bishii Oktoobar ee sanadkaan. Shan ka tirsan carruurtiisa oo dhiganaysay dugsiga hoose-dhexe ee Beergadiid ayaa hadda ku ilaaliya deegaanka Teedan ee degmada Maxaas 138 neef oo ari ah iyo 38 geel ah oo uu qoyska halkaas ula barakacay.
Carruurta ayaa sidoo kale qoyska ka caawiya soo dhaaminta biyaha, maaddaama meesha ay tuulada ka deggan yihiin ay ceelka u jirto 21 km.
Ninkaan iyo qoyskiisa waxay waddada labada tuulo u dhaxeysa oo 109 km ah ay ku soo jireen shan maalin. Xoolahooda ayaa hadda ka soo kabanaya abaarta kaddib markii ay biyo iyo baad uga heleen tuulada Teedan.
Maxamed ayaa sheegay inuu go’aansaday inuu ka soo guuro tuulada Beergadiid markii ay xoolihiisa ay billaabeen dhimashada. Waxaa ka dhintay 12 neef oo ari ahaa, oo shan ay irmaanaayeen.
Qoyska Maxamed ayaa karsada raashin uu deyn uga soo qaatay dukaamo ku yaalla deegaanka Beergadiid, ka hor inta uusan soo barakicin. Wuxuu rajeynayaa inuu daynta iska bixiyo marka ay xoolihiisa ka soo kabtaan abaarta oo ay suuq yeeshaan.
