(ERGO) –Kaaho Xasan Maxamed iyo saygeeda oo naafo ah iyo lixdooda carruur ah oo labo ay naafo yihiin oo ku nool deegaanka Banaaney ee duleedka Baladweyne ayaa toddobadii bishan lagu wareejiay guri loo dhisay.
Dhallinyaro toban ah oo wada olole ay ku caawinayaan dadka danta yar iyo naafada ayaa u dhisay gurigan markii baraha bulshada ay ku baahiyeen sawirro iyo muuqaallo ay ka duubeen qoyskan oo horay u degganaa daash aan celin karin roobka iyo qoraxda, waxaana ka soo jawaabay qurba-joog Soomaaliyed oo lacag $4,500 ah u soo dhiibay.
”Aniga oo meel buush ah iskaga jirrna, ilmahii iyo aniga oo meel aan galno laheyn oo roobka neys kaaga kor da’o ayaa allaah irid abshir ah ii furay, umaddii Soomaaliyeed oo intaa igu soo sadaqeeysatayna waa mahadsan yahiin,” ayey tiri Kaaho oo Radio Ergo la hadashay.
Nolosha qoyska kaaho ayaa ku tiirsan dhaqaalo uu aabbaha reerka kasoo helo gaari damer oo magaalada uga soo shaqeeeyo maalintii, kaas oo uu ka helo lacag udhaxeeyo 8 ilaa $6 oo aan ahayn mid joogto ah.
Dhaqaalaha uu shaqada maalin laha ah kasoo helo aabaha reerka ayey Kaaho sheegtay in ay caruurta dabka ushido labo waqti. Saddex caruurta ah ayaa u dhigato dugsi Qur’aan oo laga qaado 12$ bishii, waxayna reerku isticmaalaan biyo lacag ah oo fuustadii la iibiyo $3 maadaama deegaankoodu uusan ceel lahayn.
Cabdicasiis Maxamuud Muudey oo Gudoomiye u ah dhalinyarada u istaagay caawinta dadkan ayaa Radio Ergo u sheegay in hadafkoodu yahay in laga dulqaado dhibaato haysatay qof aan awoodin in uu iska dul qaado. Dowrkooda ayuu xusay in uu yahay soo bandhigis dhib jira iyo caawin.
‘’Mamadaas markii aan aragnay xaaladeeda, maamo cuuryaan ah oo gacmaha ku socoto, warbixin ayaan ka diyaarinay, warbixintiina jawaab fiican ayey dhashay oo qurux badan.”
Tan iyo intii ay howsha wadeen oo sagaal bil ah, waxay uruuriyeen lacag dhan $7,000 oo ay siiyeen 21 qoys oo danyar ah oo qaarkood indhaha loogu fiiqay, qaar buro looga qalay iyo kuwo hoy loogu dhisay. Sidoo kale 70 qoys ayey siiyeen raashin, iyagoo biyo dhaaminna u sameeyay.
Dadka kale ee ka faa’ideytay caawinta dhalinyaradan mudada ay shaqeeynayeen waxaa kamid ah Anisa Maxamuud Saleemaan oo haysata todobo caruur ah, kuna nool xerada lagu barakacay ee Khadiijo Khudaareey oo ku taalla xaafada Howlwadaag ee Magaalada Baladweyne.
Anisa oo ah hooyo 70 sano jir ah nolosha reerkana markii hore kasoo saari jirtay dharka dumarka oo xerada ay ku dhex iibin jirtay ayay labadii sano ee ugu dambeeyey ka wadi waysay cudurrada sokorta iyo dhiigkarka oo ku dhacay. Waxay Radio Ergo u sheegtay in ay awoodi waysay dhaqaalo ay ku tagto dhaqter ugu danbeeyna ay ku weysay aragga mid indhaha ah.
Dhalinyaradan ayaa booqday biloowgii bishii jully ee sanadkan waxaaana ay $40 ugu hagaajiyeen hoy’ga ay ku nooleeyeen reerkeeda. Waxay sidoo kale Anisa ku caawiyeen raashin ay kasoo bixiyeen dhaqaalo ay ka heleen qurba-joogta.
“Ilmaheyga oo qadsanaaayen raashin dhiile tiran oo macalaa caanahooda watay baa la ii siiyey, muddo labo biloodna waan ku moodnay. Ajir iyo xasanaaad alla ha ka siiyo, aad iyo aad baan ugu farxay”.
Siddeeddii bishan ayay sheegtay in aragga la’ayd loogu fiiqay Isbitaalka Hilaal iyo Dr Shiine uu qalliino ka sameeyay.
Xiriir dhow ayay dhallinyaradan la leeyahiin bahda caafimaadka ee ka howlgasho Magaalada Baladweyne oo ka caawiya in ay si lacag la’aan ah ugu daweeyaan dadka xanuunsan oo ay soo bandhigayaan mararka qaarna waxaa ay siiyaan dhaqaalo ay ka helaan qurba-joogta soomalliyed.
