(ERGO) – Kaaho Xersi Cali waa hooyo heysata toddobo carruur ah waxayna afar kamid ah uga heshay waxbarasho iskuulkan laga hirgaliyay tuulada Fadalaweyn oo 30 km dhinaca galbeed ka xigta magaalada Godinlabe.
Kaaho oo ku noolayd deegaankan muddo dheer ayaa ka walaacsanayd sidii ay carruurteeda ugu heli lahayd waxbarasho iskuul, waxayna raadiyo Ergo u sheegtay in ay dhowaanahanba ka fekeraysay sidii ay qorshe ugu samayn lahayd wiilkeeda carruurta u wayn oo sagaal iyo toban jira ah, waxayna ku talo jirtay in ay iibiso dhowr neef oo ari ah si ay wiilka ugu dirto magaalo kale si uu wax ugu barto, haddase taas way ka hartay.
“waxbarashada si wanaagsan ayey u socotaa si aad ah oo aan wax ka garanayo ayaa loogu soo biiray iskuulka carruurteyda bilowgooda, masha Allah waaye wiilka maalmahan ayuu dhiganayay awalna nin Qur’aan dhameyay ayuu ahay si aad ah ayuu wax u baranayaa” ayay tiri.
Reerka Kaaho oo ka kooban 9 qof oo uu ku jiro aabaha reerka waxay degaanka Fadalaweyn ku nool yihiin muddo 20 sanno ah, waxayna hadda dhaqdaan 85 neef oo ari ah, kuwaas oo ka haray xoolahoodii oo si weyn isu dhimayay sannadihii u dambeeyay abaaraha dartood. Afar sano ka hor waxay lahayd 350 neef, khasaaraha abaaruhu u geysteen ayaa sii kordhiyay duruufaha saboolnimo ee qoyskeeda.
Tuuladan Fadalaweyn oo ay ku nool yiiin ilaa 350 qoys oo xoolaha ku tiirsan ayaa carruurteeda oo dhami aysan weligood tegin iskuul, iskuulka ugu dhaw wuxuu ku yaala magaaladda Godinlabe
Macallimiin labaatan ah oo wax ka dhiga iskuullo ku yaala Cadaado iyo Godinlabe ayaa lacag ay aruurinayeen muddo 8 bil ah oo dhan $5,600 ayay dadka degaanka Fadalaweyn ugu hirgaliyeen iskuul ka kooban 3 qol kaasoo ah kiro ay bil walba ku baxayso $30 qolkiiba halka ay miisaska iyo kuraasta iskuulkan ay ku baxday lacagta ugu badan, taas oo keentay in ay galaan $1,000 oo dayn ah oo uu ku leeyahay bakhaar dhisme oo ay kaso qaateen alwaaxda miisaska iyo kuraasta laga sameyay si ay iskuulka u furaan.
Macalin Axmed Cabdullaahi Jaamac oo ka mid ah macallimiinta iskuulkan hirgaliyay ayaa idaacadda Ergo u sheegay in arrintan ay tahay gargaar waxbarasho oo la siinayo dadka xoolo-dhaqatada ah ee ka fog magaalooyinka waxbarashadu ka jirto ama aan awoodin kharashka waxbarashada kuwaaso heysta carruur badan welina xoolaha raaca. Macallimiinta wax baraya ardayda Fadalaweyn ayaa laga keenay magalooyinka Godinlabe iyo Cadaado waana saddex macallin oo hadda dhigaya Xisaab, Af-Somaali, Tarbiyo iyo Carabi, macalin walba waxaa ku baxeysa $300 oo iskugu jirta mushahar, hooy iyo raashin; lacagtaas oo ay si bille ah iskaga aruuriyaan macallimiinta hirgaliyay iskuulkan.
Waxaa kale uu macallin Axmed raadiyo Ergo u sheegay in ay khibrad u leeyihiin hirgelinta waxbarashada noocaan ah, wuxuuna xusay in ay iskuullo hore ka hirgaliyeen magalooyinka sida Cadaado iyo tuulooyinka Docoley, Iidole iyo Biyo gaduud oo dhamman ka tirsan gobolka Galgaduud kuna guuleysteen midkanna wuxuu ka rajeynayaa inuu sida kuwii hore u guuleysto.
Guddoomiyaha Fadalaweyn Calidaahir Faarax Jimcaale ayaa isagana Ergo u sheegay in maamulka tuulada uu iska dhex xulay 11 qof oo la shaqeysa macallimiinta iskuulka hirgaliyay si la iskaga kaashado saldhigashada iskuulka isla markaasna macallimiinta degaanka ku cusub ee carruurta waxbarayana laga caawiyo waxa ay u baahan yihiin.
