Dadka deegaanka Gaashaamo oo walaac ka muujinaya weerarrada shimbirka gorgorka

(ERGO) – Degaanka Gaashaamo oo ka tirsan gobolka Jarar ee ismaamulka Soomaalida Itoobiya ayaa saddexdii todobaad ee la soo dhaafay waxaa ku soo kordhay shinbirka gorgorka oo la sheegay in weerar ku haayo carruurta.

Shimbirkan ayaa la sheegay in uu dilay seddex carruur, isagoo dhaawacay afar kale. Dhacdadii u dambaysay ayaa la sheegay in ay dhacay isniintii, taa oo uu u gaystay gabadh siddeed jir ah. Gabadha ayaa waxaa soo gaaray dhawac sida uu Raadiyow Ergo u sheegay Xasan shire oo ah aabbaha dhalay gabadha.

“Qabalaha (Tuulada) Galka ayaan joognay, goor galab ah, ayuu na soo weeraray, dhegta ayuu dhexda goostay, marki dambana waan dilnay,” ayuu yiri Xasan

Muuse Muxumed Xasan oo ah afhayeenka maamulka degmada Gaashaamo ayaa wuxuu Raadiyow Ergo u sheegay in markii gorgorka bilaabay weerarka uu ku beegsanaayo carruurta feejignaayo badan la muujiyay si carruurta looga difaaco shimbirka.

 “Diyaargarow ayaa la galay carruurtii waa la xareeyay, dadkii waa waynaa ayaa xoolihii raacay, Imika dhimashadu saddex ayay maraysaa,” ayuu yiri Muse.

Haddaba shinbirkaani xaggee carruurta uu qabsado ka cunayaa, waa kan

Axmed Warsame oo ka mid ah odayaasha deegaanka Gaashaamo ayaa u sheegay Raadiyow Ergo in shimbirku uu ilmaha indhaha kala baxo.

“Wiilkii uu cunay indhaha wuu la baxay, wajiba oo dhan wuu nabarreeyay, halkan wuu ka duleeliyey nasinta la yidhaahdo ee madaxa iyo wajigu iska galaan intaas ayaa u badan meelaha uu dadka ka cunayo, iyo beerka,” ayuu yiri Axmed oo sharxaayay sida uu shimbirku u weeraro carruurta.

Dadka deegaanka ayaa arrintaani ku abuurtay walaac, iyagoona carruurta wakhtigaan aan u dirayn kaligood inay xoolaha raacaan.

Axmed Warsame ayaa sheegay in shimbirku weeraradiisa way socdaan oo uu ilaa hadda beegsanaayo carrurtu.

“Xabad uun baa bahalkaas lagu dili karaa, haddii kale wuu kaa duulayaa. Dadka deegaanku waxay u soo wada jeedaan sidii la isaga celin lahaa,” ayuu yiri Axmed.