(ERGO) – Dadka ku nool deegaanka Warta-Buraale oo magaalada Burco dhinaca waqooyi ka xigta 85km ayaa samaystay biyo qabatin, si ay biyo uga helaan iyaga iyo xoolahooda.
Degaankaan oo aan lahayn ceel biyoodyo ayaa ahaa meelaha abaarihii la soo maray ay sida xun u saameeyeen, iyaadoo biyo la’aanna looga hayaami jiray sanad kasta.
Todoba bilood oo ay qodayeen biyo xireenkaan, hadda way dhameeyeen waxaana u galay biyo ku filan dhowr bilood.
Faadumo Cismaan waxaa ay ka mid tahay xooladhaqatada degen degaankan, waxay ka qayb qaadatay qodista biyo xireenka.
“Rag iyo dumarba subaxii ayaan ku dareeraynay, markasta boqol qof ka badan ayaan ku geleynay, qof qoda, mid ciidda ka tuura, mid raashinka iyo biyaha dadka u diyaariya, si iskaashi ah ayaan hawsha ku bilownay kuna dhamaynay, si biyo qabatinka aan u hirgelino” ayay tiri Faadumo.
Faadumo waxaa ay bixisay marka xoogeeda laga soo tago 3 neef oo ariya, iyadoona haysata 25 neef oo uga soo doogay abaarihii.
“Waxaan xoogayga iyo xoolaha yare ee aan haysto u bixinayay waa in aan ka nasto in aan biyo la’aan uga guuro sanad kasta, anigoo labadii sano ee la soo dhaafay saddex goor biyo la’aan uga hayamay deeganka,” ayay tiri Faadumo.
Faadumo iyo odaygeeda oo wada nool waxay haystaa todobo carruur ah, waxay marka biyo la’aantu ku dhacdo deegaanka u guurayeen tuulada Gebagebo oo iyadu leh ceel matoor ah una jirta 65 km, waxaana nolol u ah wixii ay ka iibsadaan arigaas yar ee ay haystaan, iyadoo ay ku waayeen abaartii laba sano ka hor 150 neef oo adhiya iyo laba awr.
Cabdi Cilmi waa odayaasha tuulada, wuxuuna gudoomiye u yahay gudi 7 qof ah oo loo xilsaaray hawsha qodista biyo xireenka.
“Deegaanka marka biyo la’aantu ka dhacdo wixii guuri karayaa waa gurayeen, waxayna dadka hayaamaa dul saar ku noqonayaan deegaano kale waana dhibaato, haddana mar kale ayay dib u soo noqonayaan marka roobku da’o, dhibtaas ayaanan doonaynaa inaan ka baxno” ayuu yiri Cabdi.
Wuxuu sheegay in ay ku qaadatay todoba bilood, dadkuna gacantooda ay ku qodayeen, iyadoo ay dadka iska ururiyeen 10 geel iyo 100 ariya, oo laga qayb dhigay kharashkii ku baxay qodista, iyagoona u qaday biyo xireen 150 mitir dherer ah, 150 mitirna balac ah, halka hoosna u qodan yahay 3 mitir.
“Ilaahay xamdigii waa nagu guuleeyay, hadda waa buuxdaa, oo biyaha ku jira qiyaasta 8 bilood inay na hayaan ayaan rajaynaynaa” ayuu yiri Cabdi
Dadka ku hara ayaa biyo iiba looga keenayay magaalada Burco, iyagoo qiimo 4 doolar foostadii loogu keenayay tuulada.
Hadda dhibtaas waa ka baxeen oo iyaga iyo xooluhuba baligaan ayay ka cabayaan oo u ah biyo.
Nuur Jaaamac oo ka mid ah ragga xoogooda ku qoday biyo xireenkaan ayaa Raadiyow Ergo u sheegay in isku daygoodii ay ku guulaysteen, ayse quud daraynayaan in ay goglaan bac, si biyaha ay wakhti intaan ka sii badan ugu sii jiri karaan biyo xireenka.
Nuur waxa uu kaga qayb qaatay 5 neef oo ari ah iyo xoogiisa isaga iyo laba wiil oo uu dhalay waxaanay uga dhigan tahay in ay heleen meel ay xoolahooda ka waraabsadaan, iyaguna ka cabaan, hawshii aroorkana iyo hayaanka ay kaga nastaan.
