(ERGO) – Siraad Cabdilaahi Samatar waxaa ay ku nooshahay xerada Fadhigaab oo ku taal duleedka magaalada Ceel-afweyn ee gobolka Sanaag. Qoyskeeda oo ka kooban 5 qof uu ka mid tahay 725 qoys oo ah dadkii abaaraha 2016-2017 ka soo barakacay oo hay’ada Action siinayso lacag 75$ muddo lix bilood ah. Bilihii June, Jully ee sanadkan 2019 ayay qaadanaysaa waxaana u dhiman afar bilood.
30 doolar oo ka mid ahayd lacagta gargaarka ah ee la siiyay ayay ka sameesatay maqaayad yar oo shaaxa laga cabo 20-kii june, waxayna ku taalaa xerada dhaxdeeda. Maalinkasto waxaa ay faa’ido ahaan mehrada uga heshaa 5 doolar.
“Wax badan ayay iiga qabatay oo ay ka mid yihiin in aan carruurtayda caano u iibsado, daawo u siisto, waxbarasho geestay. Midda kale maqaayada nolasheyda ku soo korortay runtii waxa iisoo kor dhay camal iyo inaan aniga naftayda u shaqaysto.,“ ayay tiri Canab oo ah hooyo haysta 3 caruur ah.
Siraad oo 100 neef oo ari ah abaartii ku dhufatay dalka ayaa mid ahayd dadkii ka soo barakacday baadiyaha Waraabe oo ah xuduudka ay Soomaaliya iyo Itoobiya wadaagaan.
Xaashi Cabdilaahi Xasan madaxa qeybta arrimaha bini’aadanimada ee Ha’yada Action Aid ayaa sheegay in lacagta ay siinayaan dadka ay ku filan tahay nolol maalmeedka qoyska oo ay u madax banaan yihiin waxaa ay ku gadanayaan. Qorshahan waxaa uu tilmaamay in ay uga fiican tahay raashinkii la siinayay oo qoysku kaydsan karo wixii uga soo hadha marka ay raashinka ka iibsadaan.
“Sharuudaha aan ku xulanayno dadka la siinayo lacagta waxaa ka mid ah in uu qofka yahay mid soo barakacay, in uu yahay qof nugul oo ugu mudan in wax la siiyo oo mashruucan ka faa’daysan karo in uu qoyskaas yahay mid hal qof ku tiirsan sida aabaha ama hooyada ama carruurta,“ ayuu yiri Xaashi oo intaas ku daray in ay dib daba gal u sameeyaan dadka oo ay hubiyaan in ay yihiin dadkii mudnaa in la caawiyo.
Canab Maxamed Geelle oo ah hooyo qoyskeedu ka kooban yahay 9 qof waxayna ku nooshahay xerada Guryo-same oo 18 KM dhinaca koonfur kaga beegan magaalada Burco ee gobolka Togdheer.
Canab oo bilooyinkii dambe ka faa’iidaysatay mashruucan ayaa sheegtay in qoyskeeda ay heleen raashin dhameystiran.
“Nolasha qoyskayga xaqiiqatan way mahdiyeen lacagtan maxaa yeelay hadda waxaan awoodnaa in aan meel wax dhigano, in aan raashiin ku soo gadano, in aan iidaankii reerka meel fiican saarano iyo in aan meel mustaqbalka danbe meel wax u dhigano,“ ayay tiri Canab.
Qoyskan Canab ayaa 2017 ka soo barakacay tuulada baadiyaha Gacma-dheere ee dowlad deegaanka Soomaalida Itoobiya
“Gargaarkan inta aanan helin walaal nolasheenii hore aad u ahayd mid laciif ah, waxaan xasuusanaa 3-da waqti curruurta in aan hal waqti wax u karineenay oo aanan heysan wax aan carruurta siino,“ ayay tiri Canab.
