(ERGO) – Degmada Wanlaweyn wixii ka dambeeyay burburkii dowladdii dhexe ee kacaanka kama jirin isbitaal guud oo ay degmada leedahay, waxaana taasi ay sababtey in ay dadka ku nool degmadaasi ay adeegyo caafimaad ka doontaan meelaha ka fog degmadaasi.
Magaalada Muqdisho oo ay degmada wanlaweyn 60km dhinaca koonfureed kaga beegan tahay ayaa ka mid ah meelaha ay buslahada halkaasi ku nool ka raadsanadaan adeegyada caafimaad ee ay uga baahdaan isbitaalada.
Dadka ayaase isugu jira kuwa awooda in ay meelaha fog isbitaalo ka raadsadaan iyo kuwa aan awdoodin arintaasi.
Ismahaan Xasan Axmed waxaa ay iyada iyo qosykeeda ka mid yihiin dadka ku nool baadiyaha fog ee magaalada Wanlaweyn, Todobaad ka hor geeriyoodey walaalkeeda Cabdifataax Xasan Axmed oo 23sano jir ahaa.
Cabdifataax Xasan ayaa la xanuunsanayay ku dhawaad seddex sano nabar uga soo baxay qoorta, Inta uu xanuunsanaa waxaa ay Ismahan oo ah walaashiisa usheegtey Raadiyow Ergo in lagu daweynayay daawo dhireed iyo in bishiiba seddex jeer la quraan saari jirey.
Qoyska Ismahaan oo ahaa xoolo-dhaqato iyo beeralay ayaa waxaa saameyay abaaro, islamarkaana waxaa ay awoodi waayeen dhaqaalo isbitaal lagu geeyo wiilkooda. Marka la qiimeeyay khasarsh ahaan inta ku bixi karta daaweynta Cabdifatah marka loo qaado Magaalada Muqdisho ayaa wuxuu noqday $1,500 lacagtaasi oo helitaankeeda ay ku adkaatay Qosyka.
“Marka hore horta walaalkey wuu xanuunsanaa, qoorta ayaa nabar ugu soo baxay, waxaa naloo sheegay in isbitaal Xamar la geynaayo, anaga xaafadeena isbitaal kuma yaalo, daawo dhireed ayaa hore loogu daaweynaayay, marka isbitaal Xamar hala geeyaa la dhahay, isbitaalkii waxaa naloo sheegay in lacag badan qaliin loogu sameynaayo, anaga lacagtiina ma awoodin,” ayay tiri Ismahaan oo ka tiiraanyaysan dhimashada walaalkeed.
Afar Xarumood oo MCH-yo laga la socdo xaalladda caafimaad ee hooyada iyo dhalaanka, iyo Farmashiyooyin aanan dabooli karin baahiyaha caafimaad ayaa ka howlgala degmada Wanlaweyn.
Mid ka mid ah gaadiidlayda wadada Muqdisho iyo Wanlawayn isku xirta oo diiday in codkiisa iyo magiciisaba aan adeegsano ayaa Ergo u sheegey in ay dhacday marar badan isagoo dad xaaladdo deg deg ah ay la soo deristay loola soo cararey Muqdisho ay dhexda ku geeriyoodeen.
Mursal Maxamed waxaa uu dhawaan mid ka mid ah isbitaalada ku yaalla Magaalada Muqdisho oo uu laba bilood kula jirey ka soo saaray Mako Cismaan oo ah hooyadiis kadib xanuun la soo darsay.
Waxaa uu ii sheegay in xilliyo kala duwan uu la kulmay dhibaato dhinaca wadooyinka ah kadib markii ay rag hubaysan baabuur uu la socday waydiisteen lacago sharci darro ah.
“Degmada waxaan ugu baahanahay waxaa ka mid ah in aan helno isbitaal, marka laga soo tago halka aan hadda ku sugnahay ee Wanlaweyn, mararka qaar markii qof meesha laga soo qaado oo kale waxaa dhici karta in ay wadada xirran tahay, dhibaato ayay runtii nagu tahay in aan goobo caafimaad u soo aadno Muqdisho,” ayuu yiri Mursal oo hadda dib ugu laabtay magalada Wanlaweyn.
Gudoome ku-geenka Arimaha Bulshada Gobolka Shabeelaha Hoose, Cumar Carabey ayaa sheegey in ka maamul ahaan ay marar badan booqdeen degmada Wanlweyn ayna qiimeyn ku soo sameeyeen baahiyaha gaarka ah ee ka jira demadaasi.
