(ERGO) – Dhaakhaatiir xoolaha ayaa xarun lagu daaweeyo xoolaha ka hirgeliyey degmada Beledweyne ee xarunta gobolka Hiiraan.
Xoolo-dhaqatada gudaha magaalada iyo kuwa miyiga ku nool ayaa xoolaha ka jiran ee socon kara keena goobta, marka loo daaweeyna la noqda, halka kuwa aan socon karin ay dhakhaatiirtu ugu tagto goobaha ay ku sugan yihiin.
Xaruntaan oo shaqaynaysay afartii bilood ee la soo dhaafay ayaa waxaa ay daaweeyeen 380 neef oo ari, geel iyo lo’ isugu jira, iyagoona cuduro kala gedisan ka daaweeyey.
Dr. Xasan wali Cumar wuxuu ka mid yahay lix dhakhtar ee xaruntan hirgeliyey.
Wuxuu sheegay in cudurrada ugu badan ee xoolaha laga daaweyo ay kala yihiin Sambabka iyo waliba gosha ku dhacda lo’da.
“Waxaa kale oo aad uga daaweyna xoolaha dibiryada sababto ah xoolaha qaar guriga ayaa lagu fasaxa, waxayna cunaan raashiinka guryaha yaalla sida burka iyo bariiska, sokortii kuwaa oo ku keenaya dibir ay u dhiman karaan,” Dr. Xasan.
Wuxuu sheegay in ay sababaha loo furay xaruntaan ay tahay in lagu yareeyo saamaynta cudurrada ay xoolaha u dhintaan.
Maxamed Cali Aamin waxaa uu ka mid yahay xoolo-dhaqatada ku nool miyiga magaalada Beledweyne. Waxaa uu ka mid yahay xoolo-dhaqatada sida aad ka ah ugu baahi qabay helitaanka dhaqaatiir xoolaad.
Wuxuu sheegay in dhaqatiirta xoolaha u daaweyeen 12 neef oo ka mid ah 64 neef oo uga soo samata baxay abaarahii lasoo dhaafay.
“Labo ka mid ah lugaha ayay ka jabnayeen oo way ii kabeen 10-ka kalana waxa laga daaweyayay cudurada dhabiijada iyo sambabka ayay ka dureen,” ayuu yiri Maxamed.
Waxuu sheegay in markii hore ay daweysan jirnay aanan waafaqsanayn sida saxda ah taa oo marar badan sababtay dhimashada xoolo badan.
“Sababto ah ari badan oo qufac iyo xanuun qandho watay oo dhogortooda baddalantay, markii ay daawada in oo siiyeen, dhogortoodii nadiif ayay noqotay. xanuunkiina wuu ka baxay,” ayuu yiri Maxamed
Hodan Cabdi Xuseen waxay ka mid tahay qoysas magaalada dhexdeeda ku dhaqaalaysto xayn xoolo ah. Waxay Raadiyow Ergo u sheegtay in xaruntan ay ka caawisay la socodka dhanka caafimaadka xoolaheeda.
“Mudo 5 maalin laga joogo ayaan u geystay 3 neef oo ari ah oo ka mid ah 20 neef oo aan ku dhaqdo guriga, way iga xanuunsadeen, qufac iyo qandho ayaa ku dhacay. Marka si fican ayay iigu daaweyeen. Wayna ii fiican yihiin xoolaha hadda,” ayay tiri Hodan.
Dhaqaatiirtaan ayaa sheegaya in qorshahooda uu yahay in ay ku balaariyaan gobolka Hiiraan howlahan xanaannada iyo daaweynta xoolaha oo aan horay uga jirin guud ahaan gobolka.
Daawooyinka ay kula tacalaan xoolaha xanuunsan waxay kasoo iibsadaan suuqyada daawada xoolaha.
