(ERGO) – Axmed Cusmaan oo ku nool tuulada Holhol oo ku dhex-taalo dooxada Jidiinka-dodhada ee gobolka Sool wuxuu reerkiisa ka raray dooxada markii uu fariin digniin ah oo ku saabsanayd daadad laga cabsi qabay in ay ku soo rogman karaan dooxada uu ka dhagaystay RaadiyoErgo 27-kii bishii May ee sannadkan.

Raadiyo Ergo ku sheegay in ay ka sareyn doonaan qararka webiyada iyo dooxooyinka Soomaaliya.

Tugga Waxara-ciyarashe oo u dhow gurigiisa waxaa buux-dhaafiyay daadad ka dhashay roobkii guga oo halkaas si wanaagsan uga da’ay.

Axmed iyo in ka badan boqol qoys ayaa ka cararay guryahooda markii ay maqleen saadaasha roobka.

“Maalintaas waxaan dhageysanaayay Raadiyo Ergo oo aan maalinle u dhageysto. Waxaa isoo jiidatay markii aan maqlay saadaasha roobabka oo dadka deegaankeenna uga digaysa in ay ka fogaadaan dooxooyinka oo daadad ay la dhalan karaan,” ayuu yiri Axmed oo toddobo sano ka mid ahaa dhageyseyaasha ku xiran Raadiyow Ergo.

Maalmo yar un kaddib markii Axmed iyo dadka dariska la ahaa ay ka guureen guryahooda waxaa dooxada Waxara-ciyarashe ay sameysay daadad xoog leh ku fatahay deegaannada u dhow.

Dadka qaar ayaa iska daga-tiray digniinta ay maqleen kuwaa oo ku markii dambe ku go’doomay deegaannada ay daadadku saameeyeen.

“Waxaan ogahay qoys ku xayirmay deegaanada fatahaadda ka dhacday isbuuc kaddib markii aan digniinta maqalnay, isbuucaas kaddib waxaa soo bedbaadiyay in ka badan boqol qof oo dadka deegaanka ah oo u gurmaday,” ayuu yiri Axmed.

Axmed ayaa dib xusuustay daadad xoog leh oo dooxada ka dhacay sannadkii 2004 kuwaa oo ay ku dhinteen konton neef oo ari ah, sidoo kale baabi’isay hanti.

Wuxuu sheegay in xillagaas aysan u suuragal ahaan jirin helista wararka saadaasha roobka iyi digniinaha.