(ERGO) – Fahiima Cabdiraxmaan Cali oo 14 jir ah kuna nool deegaanka Beer oo magaalada Burco u jirta 25 Km ayaa waxay ka mid noqotay 15 gabdhood oo aan qaan-gaarin kuwaa oo ka bilaabay ol’ole ka dhan ah gudniinka fircooniga deegaankaas.
Gabadhan iyo saaxibadeed ayaa waxay wacyigalin ka sameeyaan maalin kasta oo khamiis ah iskuulkooda oo lagu magacaabo Sheekh-Cabdiqaadir.
Fahiima oo ah fasalka labaad ee dugsiga sare ayaa ol’olaheeda ku beegsata gabdhaha yaryare ee fasalada la dhigta iyo waalidinta iskuulka yimaada.
“Waxaan ku qancinaa dadka gabdhaha iyo waalidka in aan u sheegno gudniinka fircooniga ah in uu yahay mid dhib badan oo qatar badan oo gabadha ay u geeriyoon karto inta uu xidid dilaaco oo dhiig baxdo,” ayay tiri Fahiima iyadu qodheedu ka badbaaday gudniinka labo jeer.
Sida ay Raadiyow Ergo u sheegtay, Fahiima ayaa markii koobaad ka badbaaday gudniinka sanadkii 2015 markaa oo ay hooyadeed aaday safar loon dib dhigay gudniinka si loo la sugo hooyadeed.
Balse nasiib wanaag waxay mar labaad ka badbaaday markii hay’ada Action Aid oo ah hay’ad caalami ah ay wacyigalin ka bilaawday deegaanka sanadkii 2016.
Fahiima ayaa xustay in qaar saaxiibadeed ka mid ah oo loo gudday fircooni ay u soo qaadato tusaale marka ay wacyigelinta samaynayso.
“Aniga waan ka duwannahay gabdhaha kale ee saaxiibaday ah ee aan aqaano kuwaa fircooniga ah, ma dareemo in aan caadada ku dhibtoodo, halka saaxiibaday kale ay ku dhib qaban caadada,”ayay tiri Fahiima.
Maryan Cismaan oo ah hooyada dhashay lix caruur ah kuna nool deegaanka Biyo-macaan ee degmada Gabiley ayaa Raadiyow Ergo u sheegtay in laba hablood oo ay dhashey in aysan guddin.
Waxay sheegtay in ay garwaaqsatay dhibaatada uu leeyahay gudniinka kaddib markii laga wacyi geliyay.
“Waalidka waagii hore, waxaa ku qasbi jiray in ay gabdhaha fircooni u gudaan jahlinimo iyo diinta oo aysan sida ay tahay u qaadan. wacyigalintaan naloo soo sameen jiray waxay iga badashay fikirkii ahaa in aan inantayda u gudo fircooni,” ayay tiri Maryan iyadu qudheedhu ah qof loo soo guday fircooni.
Madaxa arrimaha bini’aadanimada ee haayada Action Aid, Xaashi Cabdilaahi ayaa sheegay in 7500 oo qof oo ku nool deegaannada kala ah Biyo macaan, Taysa, Ijaara, Qoyta, Beer iyo Inna-afmadoobe oo ka kala tirsan gobolada Togdheer iyo Maroodijeex ay ka wacyigaliyeen fircooniga tan iyo markii uu barnaamijkan ka bilaawday 4 sano.
“Bulshooyinkaas lixdaas deegaan ku nool waxay nagu dheheen waan joojinay gabi ahaan in aan awlaadeena u gudno gudniinka fircooniga ah,” ayuu yiri Xaashi.
