(ERGO) – Inka badan 31 kun oo arday ayaa maanta dalka oo dhan uga fariisatey imtixaanka shahaadiga ee ay qaadeyso wasaarada Waxbarshada ee xukuumada Fadaraalka Soomaaliya.
Imtixaanaadkan ayaa waxay kala dhacayaan Gobalka Banaadir iyo Xarumaha Dowlad gobaleedyada dalka.
Magaalada Baydhabo oo ah xarunta ku-meel-gaalka ee dowlad gobaleedka Koonfur Galbeed, ayaa waxa uu imtixaankan ka dhacayaa afar goobood.
Ammaanka goobaha imtixaanka lagu qaadayo ayaa sidoo kale aad loo adkeeyay.
Ardayda imtixaanka dugsiga sare u fariisatay magaalada Baydhabo waxay tiradooda gaaraysaa 185 arday, sida uu i noo xaqiijiya, Saciid Yuusuf Maxamed oo ah kormeeraha guud ee wasaaradda waxabrashada Soomaaliya qeybta gobolka Bay
“Si deganaan ah ayaa maanta uu noogu furmay imtixaanka. Waana ku faraxsanahay,barnaamijkan ka soconaya xarumaha qaar ee magaalada Baydhabo. Maanta maadooyinka Soomali iyo Tarbiyada ayaa la galayaa. Waa imtixaan cusub maadama kii hore fashilmay, waana laga taxadirey sidii hore in ay wax u dhacaan,” ayuu yiri Saciid.
Ayadoo xalay waxaa baraha bulshada ay ku xiriirto ee internet-ka lagu faafiyay warqado la sheegayo in ay yihiin maaddooyinka imtixaanka ee maanta la qaadayo, ayuu kormeeraha wax kama jiraan ku tilmaamay in warqadaha imtixaanka la helay.
“Warqadaha waa been abuur,kuwan hada la sheegayo oo baraha bulshada lagu faafiyey fiidkii xaley waa kuwii hore waxna kama jiraan,arintii ku aadaneyd khadka internet-ka la jarayo waa arin u taala wasaarada marka iney jarayaan iyo kale waan arkeynaa,” ayuu yiri Saciid.
Dowladda ayaa horay u sheegtay in la jari doono internet-ka inta uu imtixaanku socdo, balse waxay u muuqataa in aysan taasi suurtagelin maaddaama magaalooyinka waaweyn uu internet-ku caadi u shaqeynayo.
Balse wasiirka Wasaarada waxabasharada Koonfur galbeed Cabdiraxmaan Cusmaan Malaaq ayaa sheegey in wax kasta la filan karo taas oo uu sheegey in mas,uuliyadeeda dowlada dhaxe qaadeyso.
“Cabashadii horey u jirtey waa la wada xaliyey hadda laakiin haddii mar kale qalad dhankeeda ka dhaco mas’uuliyada iyadaa qaadeyso. Anaga xageeda qaladka ma aheyn,” ayuu yiri wasiirka.
Qaar ka mid ardayda imtixaanka galaysay maanta walwalsan ka muujiyay in mar kale la xannibo imtixaanaadka ayaa ka codsaday in dowladda ay xaqiijiso hufnaanta imtixaanka.
Xasan Aadan Cali waa gudoomiyaha midowga iskuuladka gaarka loo leeyahay ee magaalada Baydhabo.
Xasan waxaa uu sheegey in cabashadii horey u muujiyeen wasaarada ka qancisay islamarkaana ay raali ka yihiin qabsoomida Imtixaankan oo ahaa mid horey loo joojiyey.
“Anaga hadii aynu nahay maamulada Iskuulada Baydhabo, wixii horey u dhacay cabasho ayaa ka muujiney. waxaan sheegney iney qalad aheyn in imtixaankii horey u socdey la joojiyo,balse wada hadal ayaa dhacey oo wasaaradaha waxbarashada iyo dowladda dhaxe,” sidaas ayuu Xasan u sheegay Raadiyo Ergo.
