(ERGO) – Faarax Jaamac Cali, waa arday 20 jir ah oo sanadkii hore ee 2018 dhammeeyay fasalka shanaad ee dugsiga dhexe, laakiin sanadkaan ma haysto fasal uu waxbarashadiisa ku sii wato.
Wuxuu shantaas sano waxbarashada ku soo qaatay geed hoostiisa. “Dhagax ayaan ku fariisan jiray, waanse ku qanacsanaa inaan wax ku barto, laakiin dhibka hadda jira waa meel aan u sii dhaafo ayaananba haysan oo fasal ma jiro,” ayuu yiri Faarax.
Wuxuu ka mid yahay 20 arday oo dhammesay waxbarashada fasalka shanaad, kuwaas oo aan haysan fasal ay wax ku bartaan, sababtoo ah geedka ay ardaydu wax ku hoos bartaan ayaa buux dhaafay oo aan lahayn fursad kale oo ay ardayda u gudubtay fasalka lixaad wax ugu bartaan.
Faarax wuxuu ku nool yahay tuulada Ceel-la-helay, 92 km dhanka bari kaga beegan magaalada Burco. Tuuladu ma laha adeegyada aas aasiga ah ee warbarashada iyo caafimaadka.
Siddeetan arday ah ayaase wax ku barta geed hoostiisa. Geedkan oo ah kan keliya eek u yaalla tuulada ayaa ardayda wax lagu baraa labo elin maalintii, waxayna fasalki oo ka kooban 20 arday wax bartaa hal saac iyo 45 daqiiqo. Ardayda ayaa isugu jira 30 gabdhood iyo 50 wiil.
Cali Carab Yuusuf oo ka mid ah macallimiinta wax bara ardaydaan ayaa Raadiyo Ergo u sheegay inuusan jirin wax dhisme ah oo ardayda wax lagu bari karo oo ku yaalla tuulada, sidaas darteedna ay sanadkii 2012-kii hindiseen in geedka hoostiisa ay wax ugu dhigaan ardayda.
“Degaankani waa dhul qallalan, geedo badan ma lahan, geedkaan oo galool ah ayaana ah midka keliya ee hadda kuyaalla meesha. Shan fasal ayaan ku dhignaa oo ardayda ay isu beddelaan gelinka hore iyo kan danbe, halka fasalkii lixaad ardaydii u gudubtay aan wakhti loo hayn,” ayuu yiri Cali.
Carruurta geedka hoostiisa wax ku barta ayaa ka soo jeeda qoysas ku soo barakacay abaarti iyo kuwo horay deegaanka u degganaa. Tuulada waxaa ku nool 500 oo qoys oo 350 ka tirsan ay yihiin dadka miyiga ka soo barakacay.
Xaliimo Faarax Xasan waxay ka mid tahay waalidiinta ku nool tuulada oo carruurta ay halkaas wax ugu bartaan. Siddeed ka tirsan 12 carruur ah oo ay dhashay ayaa geedka hoostiisa wax ugu barta.
“Carruurtu si wanaagsan ayay wax noogu bartaan, wax lacag ahna ma nalaga qaado. Carruurteyda kan u sarreeya wuxuu dhigtaa fasalka shanaad, kan u hooseeyana fasalka koowaad,” ayay tiri Xaliimo.
Waalidiinta iyaga ayaa carruurtooda u iibiya agabka waxbarashada sida buugaagta iyo qalimada, mana laha dhar gaar ah oo ay carruurtu wax ku bartaan.
Saddex macallin ayaa wax bara ardayda, waxaana ay wasaaradda waxbarashada ee Somaliland mushahar siisaa hal macallin oo keliya, labada kalena waxay ku shaqeeyaan si mutadawacnimo ah.
Guddoomiyaha waxbarashada gobolka Saraar ee Somaliland Jaamac Muuse Faarax oo jooga degmada Caynaba ayaa Raadiyo Ergo taleefanka ugu sheegay in ay og yihiin duruufta ay wax ku bartaan ardayda tuulada Ceel-la-helay, sidoo kalena ay jiraan 13 tuulo oo kale oo ka tirsan Saraar oo 1,500 oo arday oo ku nool ay wax ku bartaan geeda hoostood.
“Muhiimaddu waa in waxbarashadu socoto duruuf kastaba ha jirtee. Waxaan isku daynay uin macallimiinta qaarkood aan mushahar siinno, kuwa kalena waan ku howl jirnaa,” ayuu yiri guddoomiyuhu.
Wuxuu xusay in wasaaradda Waxbarashada ay u gudbiyeen sidii fasallo loogu dhisi lahaa, laakiin weli aysan suurto gelin dhaqaale la’aan jirto darteed.
