(ERGO) – Labo boqol iyo siddeetan qoys oo xoolo-dhaqato ayaa muddo bil gudaheeda ah ka guuray tuulada Wayaamo-jibriil oo 120 km dhanka bari kaga beegan magaalada Gaarisa ee gobolka Waqooyi-bari Kenya.
Tuulada ayaa horay ugu tiirsaneyd war ay biyaha ay galaan xillii roobaadyada, laakiin hadda qallashay bilk a hor, sida ay Raadiyo Ergo u sheegeen dadka deegaanka.
Wadaamo-jibriil waxaa ku noolaa saddex boqol oo qoys, waxaana hadda ku haray 20 qoys oo ku tiirsan biyo lagu keeno baabuur taksi ah oo qaado 25 caag oo min 20 liitar ah. Biyaha ayaa looga keenaa masaafe 50 km u jira, waxaa gaariga uu u keenaa biyaha lacag u dheeysa 2,000 ilaa 3000 oo shilin Kenya ah oo u dhigantan $20 ilaa $30.
Dadka deegaankuna waxay halki caag oo 20 liitar qaadka ah ku iibsadaan 120 shilin Kenya ah. Dadkaas waxaa ka mid ah Cabdiweli Muxumed Faarax, wuxuu Raadiyo Ergo u sheegay in qiimaha biyaha uu aad u sarreeyo oo dadku ay ku adag tahay in wakhtigaan ay biyo ku filan iibsadaan.
Wuxuu xusay in dadka tuulada ay ku tiirsanaayeen xoolaha, laakiin xoolihi ay dadka dhaqanayeen ay noqdeen wax ay abaarti laysay iyo kuwo lala hayaamay marki ay biyo la’aantu dhacday.
Tuuladan ka di’in saddex xilli roobaad, waana tan keentay in biyo la’aan darteed ay dadkii ugu badnaa uga hayaamaan tuulada.
Cabdulaahi Muxumed Boorow oo isagana ka mid ah dadka ku haray tuulada, wuxuu Raadiyo Ergo u sheegay in dadka ugu badan ee tuulada biyo la’aanta uga tagay ay yihiin haween iyo carruur.
“Dadki way kala hayaameen, musiibo xun ayaana meesha nagu hayso. Carruurti iyo haweenki tagay dhexda ayay kuhareen oo mootooyin ayaa biyo loogu geeyay,” ayuu yiri.
Wuxuu xusay in dadka ku haray deegaanka ay ku adag tahay xataa inay cunto karsadaan biyo la’aanta darteed. Dadkuna waxay ku khasban yihiin inay beekhaamiyaan biyaha yare e ay helayaan maaddaama aanay awoodin inay mar kasta biyo iibsadaan.
Wuxuu sidoo kale tilmaamay in xataa dugsiga hoose dhexe ee tuulada uu xirmay markii biyo la’aantu ay dhacdo, sababtana ay tahay in ardaydi ay raaceen qoysaskoodii hayaamay.
Wasiirka Wasaaradda Biyaha ee ismaamulka Gaarisa Ciise Ooyow ayaa Raadiyo Ergo u sheegay in ay ka war hayaan dhibaatada ay dadka deegaankaas ku qabaan biyo la’aanta. Waxaa sidoo kale jiro tuulooyin kale oo ay biyo yaraan ka jirto.
Ciise ayaa xusay in uu jiro qorshe sanadkaan gudihiisa 40 ceel looga qodayo deegaannada aan ceelasha lahayn ee hoostaga Gaarisa.
