(ERGO) – Ururrada haweenka ee Somaliland ayaa maanta ka qeyb galay shir weyne lagu qabtay magaalada Hargeysa. Shirka waxaa lagu soo bandhigay caqabadaha dumarka ka haysta shaqooyinka, siyaasadda iyo ka qeyb galka go’aannada bulshada ee dowladda.
Haweenka ka qeyb galay shirka ayaa soo gudbiyay warbixin muujineysa qaabka ay shaqooyinka u helaan oo hooseeya, haweenka suuqyada ku ganacsada oo aan helin goobo fiican oo ay ku ganacsadaan, saamiga xilalka xukuumadda Somaliland ay ku leeyihiin oo yar iyo in loo baahan yahay in kor loo qaado.
Dumarka ayaa soo dhoweeyay koontada shaqooyinka caadiga ah looga sameeyay.
Guddoomiye ku-xigeen dallada Nagaad ee haweenka Somaliland ay ku mideysan yihiin Khadra Cumar Xasan ayaa sheegtay in shirka ay u qabteen inay ku soo bandhigaan caqabadaha ku gedaaman haweenka, si wax looga qabto.
Madaxweynaha Somaliland oo ka qeyb galay shirka ayaa sheegay kuraasta uu u kordhin doono dumarkam isagaoo tilmaamay in hay’adda shaqaalaha ee dowladda uu ku amray in haweenka ay gooni ugu tartamaan shaqooyinka dowladda si loo dhiirri geliyo.
“Xeer madaxwayne ayaan ku soo saaray in 30% la siiyo shaqooyinka oo kooto loogu xiro, sidoo kale imtixaankii lama galayaan ragga,” ayuu yiri madaxweyne Muuse Biixi.
Sucaad Yuusuf Carmiye oo ka mid ah haweenka soo qaban qaabiyay shirkan ayaa sheegtay in shirkani dhiirri galinayo inay isku xirnaadaan haweenku.
“Wuxuu shirku soo kordhinayaa in haweenkii midoobaan, dowladdiina aan ka helno shaqo iyo metelaad xilalkii sare, Madaxwaynihii wax kasta oo aanu u sheegnay wuu aqbalay, waxaanu rajeynaynaa inay wax beddelaan oo degdeg uu dhibta aanu u sheegnay wax uga qabto,” ayay tiri Sucaad.
Warbixin ay bishii hore soo saartay hay’adda Center Policy Analysis ayay sheegtay in tirada dumarka ka shaqeeya xafiiska dowladda ay ka hooseeyaan boqolkiiba shan iyo labaatan, goleyaasha deegaanka ay kaga jiraan lix dumar ah, golaha wakiillada ay kaga jirto hal xildhibaan, golaha wasiirada ay ku jiraan saddex haween, halka agaasimeyaasha oo gaaraya 25 ay hal keliya gabar tahay.
Waa markii u horeysa ee Somaliland lagu qabto shir ay haweenku iskugu yimaadaan oo ay ku soo bandhigaan cabashooyinka iyo dhibaatooyinka ay qabaan.
