(ERGO) – Saddex toddobaad ka hor ayaa biyo ugu dambeysay degmada Buurhakaba, xilligaas oo ay gureen waro ay dadku biyo ka cabbi jireen oo ku yaalla degmada, taas oo keentay in dadku ay biyo u doontaan ceel ku taalla tuulada Goley oo 10 km u jirta.
Saameynta ugu badan waxay ku yeelatay haweenka uurka leh ee aan awoodin inay iibsadaan biyaha laga keeno tuulada oo qaali ka ah gudaha Buurhakaba.
Toddobaadkii hore saddex haween oo uur lahaa ayay ka soo dhaceen ilmaha, kaddib markii ay masaafaha dheer ku soo xambaareen biyo ay qoysaskooda oo danyar ah ku waraabinayeen, sida ay Raadiyo Ergo u sheegtay Deeqo Sheekh Maxamed oo ah guddoomiyaha ururka haweenka Buurhakaba.
“Waxay masaafaha dheer dhabarkooda uga keenaan jirgaanno culus oo biyo ah. Toddobaadki hore saddex haweenka ayaa la geeyay isbitaalka markii ay si lama filaan ah fool u qabatay. Labo ka mid ah ayay weli xaaladdooda wanaagsaneyn,” ayay tiri Deeqa.
Foostadi biyaha oo la iibin jiray 15 kun oo shilin Soomaali ah waxay hadda Buurhakaba ka mareysaa 80 kun oo shilin.
Deeqa ayaa xustay in dariiqa keliya ee haweenka qoysaska danyarta ah ka soo jeeda ay biyo ku heli karaan wakhtigaan ay tahay in dhabarkooda ay ku soo aroortaan.
Xabiibo Macallin Aadan waxay ka mid tahay haweenkaas aan awoodin inay biyaha iibsadaan. Maalin walba waxay u lugeysaa Galey oo ah halka ugu dhow ee ay biyo ka heli karto.
“In kastoo qorraxdu kulushahay, masaafaduna fog tahay, maalin walba waxaan soo arooraa boqol liitar oo biyo ah. Xataa kuma filna qoyska. Haweenka biyaha soo arooranaayo qaarkood waxay ku suuxaan waddada dhexdeeda, sababtoo ah daalka iyo culeyska,” ayay tiri Xabiiba.
Deeqo waxay ka codsatay maamulka koonfur galbeed iyo hay’adaha arrimaha bani’aadamnimada in ay wax ka qabtaan dhibaatada biyo la’aanta.
Maxamed Isaaq Bashiir oo ka mid ah odayaasha Buurhakaba ayaa Raadiyo Ergo u sheegay in biyo la’aantu ay sidoo kale dhalisay rabshado ka dhex dhaca dadka marka ay biyaha dhaansanayaan.
Wuxuu tilmaamay in xaaladda biyo la’aanta ee magaalada ay gaartay heer ay dhibaato isu baddesho, isagoo xusay in booyadaha biyaha iyo haamaha lagu keydiyo biyaha looga baahan yahay magaalada.
Maamulka koonfur galbeed oo kaashanaya Howlgalka Nabad Ilaalinta Midowga Afrika ee Soomaaliya (AMISOM) ayaa hal ceel ka qoday magaalada, laakiin weli ma uusan shaqeyn howlshii lagu hagaajinayay oo qabyo ah iyo cillado uu yeeshay darteed.
Wasiirka biyaha ee maamulka Aadan Xasan Maxamed ayaa sheegay in ay qorsheenayaan in ceelal kale ay qodaan si dadka deegaanku ay biyo u helaan.
Wuxuu tilmaamay in qorshuhu yahay wixii ka dambeeya doorashada madaxtinimo ee koonfur galbeed.
